സിനിമയുടെ ദൈര്‍ഘ്യം കുറച്ചു; വിജയകരമായി പ്രദർശനം തുടർന്ന് അം അഃ

ദിലീഷ് പോത്തന്‍, ജാഫര്‍ ഇടുക്കി, ദേവദര്‍ശിനി എന്നിവരെ പ്രധാന കഥാപാത്രങ്ങളാക്കി തോമസ് സെബാസ്റ്റ്യന്‍ സംവിധാനം ചെയ്ത ചിത്രമാണ് അം അഃ. ഈ മാസം 24-ാം തീയതി ആയിരുന്നു ചിത്രത്തിന്റെ റിലീസ്. ഇപ്പോഴിതാ പ്രേക്ഷകരുടെ അഭിപ്രായം മാനിച്ച് ചിത്രത്തിന്റെ ദൈര്‍ഘ്യം കുറച്ചിരിക്കുകയാണ് അണിയറക്കാര്‍. ഒരു മണിക്കൂര്‍ 55 മിനിറ്റ് ദൈര്‍ഘ്യമുണ്ടായിരുന്നതില്‍ നിന്നും 7 മിനിറ്റാണ് ഇപ്പോള്‍ വീണ്ടും അണിയറ പ്രവര്‍ത്തകര്‍ കുറച്ചിരിക്കുന്നത്. ദൈര്‍ഘ്യം കുറച്ച പുതിയ പതിപ്പ് ഒന്ന് രണ്ട് ദിവസത്തിനുള്ളില്‍ തീയറ്ററുകളിലെത്തും.

ചുരുങ്ങിയ സമയത്തിനുള്ളില്‍ മികച്ച ഒരു കഥ പറഞ്ഞുവച്ചുവെന്ന രീതിയില്‍ തീയറ്ററുകളില്‍ മികച്ച അഭിപ്രായം നേടിയ ചിത്രമാണിത്. ദേവദര്‍ശിനിയുടെ മലയാളത്തിലെ ആദ്യ നായികാ കഥാപാത്രമാണ് ‘അം അഃ’ലേത്. മീര വാസുദേവ്, ജയരാജന്‍ കോഴിക്കോട്, നവാസ് വള്ളിക്കുന്ന്, അലന്‍സിയര്‍, ടി ജി രവി, അനുരൂപ് തുടങ്ങിയ പ്രമുഖ അഭിനേതാക്കളും ചിത്രത്തിലുണ്ട്. കവിപ്രസാദ് ഗോപിനാഥാണ് ചിത്രത്തിന്റെ തിരക്കഥ. ഗോപി സുന്ദറാണ് ഗാനങ്ങളും പശ്ചാത്തല സംഗീതവും ഒരുക്കിയിരിക്കുന്നത്. ഛായാഗ്രഹണം അനീഷ് ലാലും എഡിറ്റിംഗ് ബിജിത് ബാലയും നിര്‍വഹിച്ചിരിക്കുന്നു.