മെസ്സിയോട് അസൂയ; നെയ്മറുടെ വെളിപ്പെടുത്തലിൽ മറുപടിയുമായി എംബാപ്പെ

മാഡ്രിഡ്: കഴിഞ്ഞദിവസം നെയ്മർ നടത്തിയ വെളിപ്പെടുത്തലില്‍ പ്രതികരിച്ച് ഫ്രഞ്ച് യുവതാരം കിലിയന്‍ എംബാപ്പെ. പി.എസ്.ജിയില്‍ കളിച്ചിരുന്ന സമയത്ത് കിലിയന്‍ എംബാപ്പെക്ക് ലയണല്‍ മെസ്സിയോട് അസൂയയുണ്ടായിരുന്നെന്നാണ് നെയ്മര്‍ തുറന്നു പറഞ്ഞിരുന്നത്.

നെയ്മറിന്റെ പ്രതികരണത്തില്‍ മറുപടിയുമായി ഫ്രഞ്ച് താരം കിലിയന്‍ എംബാപെ ഇപ്പോൾ രംഗത്തെത്തിയിരിക്കുകയാണ്. നെയ്മറിനോട് ബഹുമാനമുണ്ടെന്ന് പറഞ്ഞ ഫ്രഞ്ച് താരം പി.എസ്.ജിയില്‍ ബ്രസീലിയന്‍ താരത്തിനൊപ്പമുള്ള നല്ല നിമിഷങ്ങള്‍ ഓര്‍ക്കാനാണ് ഇഷ്ടപ്പെടുന്നതെന്നും വ്യക്തമാക്കി.
‘ഇക്കാര്യത്തില്‍ എനിക്ക് ഒന്നും പറയാനില്ല. റയല്‍ മാഡ്രിഡില്‍ ശ്രദ്ധകേന്ദ്രീകരിക്കുകയാണിപ്പോള്‍. എനിക്ക് നെയ്മറിനോട് ബഹുമാനമുണ്ട്. പാരീസില്‍ അയാള്‍ക്കൊപ്പമുള്ള നല്ല നിമിഷങ്ങള്‍ ഓര്‍ക്കാനാണ് ഇഷ്ടം. നെയ്മറിനെ കുറിച്ച് എനിക്ക് വേണമെങ്കില്‍ പലതവണ സംസാരിക്കാമായിരുന്നു. ഫുട്ബോളിലെ അതുല്യ പ്രതിഭയായ നെയ്മറുമായുള്ള നല്ലകാര്യങ്ങള്‍ മാത്രം ഓര്‍ക്കാനാണ് ആഗ്രഹിക്കുന്നത്. നെയ്മറിനും കുടുംബത്തിനും സുഹൃത്തുക്കള്‍ക്കും ആശംസകള്‍ -ചാനല്‍ അഭിമുഖത്തില്‍ എംബാപെ പറഞ്ഞു

ഞങ്ങള്‍ തമ്മില്‍ നല്ല സൗഹൃദത്തിലായിരുന്നുവെന്നും മെസ്സി വന്നതിന് ശേഷം കാര്യങ്ങള്‍ മാറിമറിയുകയായിരുന്നുവെന്നുമാണ് കഴിഞ്ഞദിവസം അഭിമുഖത്തിനിടെ നെയ്മര്‍ വ്യക്തമാക്കിയത്. ‘എംബാപെക്ക് മെസ്സിയോട് അസൂയയായിരുന്നു. താന്‍ സൗഹൃദം പങ്കിടുന്നത് ഇഷ്ടമായില്ലെന്നും ഇതുമായി ബന്ധപ്പെട്ട് പലപ്പോഴും വഴക്കിടേണ്ടിവന്നതായും’ നെയ്മര്‍ പറഞ്ഞു.