വനിതാ ഫുട്‌ബോൾ: ട്രാൻസ്ഫർ തുകയിൽ റെക്കോഡ് നേട്ടവുമായി നവോമി ഗിർമ

ലണ്ടൻ: വനിതാ ഫുട്‌ബോളിൽ ട്രാൻസ്ഫർ തുകയിൽ റെക്കോഡ് നേട്ടവുമായി അമേരിക്കൻ പ്രതിരോധനിര താരം നവോമി ഗിർമ. അമേരിക്കൻ ക്ലബ്ബ് സാൻ ഡീഗോ വേവ്‌സിൽ നിന്നും 11 ലക്ഷം ഡോളറിനാണ് (ഏകദേശം 95 കോടി രൂപ) ഇംഗ്ലീഷ് ക്ലബ്ബ് ചെൽസി നവോമിയെ സ്വന്തമാക്കിയത്. ഇതോടെ വനിതാ ഫുട്‌ബോളിൽ ഒരു മില്യൺ ഡോളർ ട്രാൻസ്ഫർ തുക ലഭിക്കുന്ന ആദ്യ താരമെന്ന നേട്ടവും ഗിർമയ്ക്ക് സ്വന്തമായി.

ഇതിനു പുറമെ ഏറ്റവും കൂടുതൽ ട്രാൻസ്ഫർ തുകയെന്ന റെക്കോർഡും ലഭിച്ചു. അമേരിക്കൻ ക്ലബ്ബ് ബേ എഫ്.സി. സാംബിയ താരം റേച്ചൽ കുൻഡാങ്ജിയയ്ക്കായി 73 കോടി ട്രാൻസ്ഫർ തുകനൽകിയതായിരുന്നു ഇതിന് മുൻപുള്ള റെക്കോർഡ്. വനിതാ സൂപ്പർ ലീഗ് ചാമ്പ്യൻമാരായ ചെൽസി പ്രതിരോധം ശക്തമാക്കുന്നതിന്റെ ഭാഗമായിട്ടാണ് 24-കാരിയായ അമേരിക്കൻ താരത്തെ ഇത്രയും വലിയ തുകയ്ക്ക് സ്വന്തമാക്കിയത്. സെൻട്രൽ ബാക്ക് കഡെയ്ഷ എഡ്വെൽ പരിക്കേറ്റ് പുറത്തായത് ചെൽസിക്ക് തിരിച്ചടിയായിരുന്നു. സാൻ ഡീഗോക്കായി 75 മത്സരം കളിച്ച താരമാണ് നവോമി ഗിർമ. അമേരിക്കൻ ടീമിനായി 2022 മുതൽ കളിക്കുന്ന താരം 44 മത്സരങ്ങളിൽ കളിച്ചിട്ടുണ്ട്.