കടലിൽ കുളിക്കാൻ ഇറങ്ങി അടിയൊഴുക്കിൽപ്പെട്ടു; ഇതര സംസ്ഥാനക്കാരനായ യുവാവിന് രക്ഷകരായി ലൈഫ് ഗാർഡുകൾ

തിരുവനന്തപുരം: കടലിൽ കുളിക്കവെ അടിയൊഴുക്കിൽപ്പെട്ട ഇതര സംസ്ഥാനക്കാരനായ യുവാവിനെ ലൈഫ് ഗാർഡുകൾ രക്ഷപ്പെടുത്തി. കോവളത്ത് കടലിൽ കുളിക്കാൻ ഇറങ്ങിയ ഡൽഹി സ്വദേശി ആമിർ (22) ആണ് അടിയൊഴുക്കിൽപ്പെട്ടത്. ഇടക്കല്ലിന് സമീപത്തെ ബീച്ചിൽ കുളിച്ചുകൊണ്ടിരിക്കവേ ശക്തമായ തിരയടിച്ച് അടിയൊഴുക്കിൽ പെടുകയായിരുന്നു. സമീപത്തുണ്ടായിരുന്നവർ ബഹളം വെച്ചതോടെ സംഭവം കണ്ട ലൈഫ് ഗാർഡുകൾ ചേർന്ന് ആമിറിനെ രക്ഷപ്പെടുത്തി കരയ്‌ക്കെത്തിക്കുകയായിരുന്നു.

കോവളം തീരത്ത് തിരയടി ശക്തമായതിനെത്തുടർന്ന് കഴിഞ്ഞയാഴ്ച സഞ്ചാരികൾക്ക് കടലിലിറങ്ങുന്നത് വിലക്കേർപ്പെടുത്തിയിരുന്നു. കോവളത്തും സമീപ പ്രദേശത്തും ഇന്നലെ തിര അൽപ്പം ഉയർന്ന നിലയിലായിരുന്നു. ബീച്ചുകളിൽ അപായ സൂചനയായി ചുവന്ന കൊടിയും സ്ഥാപിച്ചിരുന്നു.