നിവിൻ പോളിയുടെ ബിഗ് ബജറ്റ് ചിത്രം വരുന്നു; നിർമ്മാണം ഗോകുലം ഗോപാലൻ

നിവിന്‍ പോളി ശ്രീ ഗോകുലം മൂവീസിന്റെ ബാനറില്‍ ഗോകുലം ഗോപാലന്‍ നിര്‍മ്മിക്കുന്ന ബിഗ് ബഡ്ജറ്റില്‍ ചിത്രത്തില്‍ നായകനാവുന്നു. 2025 ല്‍ ചിത്രീകരണം ആരംഭിക്കുന്ന ഈ ചിത്രത്തിന്റെ ഔദ്യോഗിക പ്രഖ്യാപനം അധികം വൈകാതെ ഉണ്ടാകുമെന്നാണ് സൂചന. ചിത്രത്തെ കുറിച്ചുള്ള കൂടുതല്‍ വിവരങ്ങള്‍ ഒന്നും പുറത്തു വന്നിട്ടില്ല.

അതേസമയം, കഴിഞ്ഞ വര്‍ഷം രണ്ടു ചിത്രങ്ങളാണ് നിവിന്‍ പോളിയുടേതായി തിയറ്ററുകളിലെത്തിയത്. മലയാളി ഫ്രം ഇന്ത്യയും വര്‍ഷങ്ങള്‍ക്കു ശേഷവും. നിവിന്‍ അതിഥിവേഷത്തിലെത്തിയ വര്‍ഷങ്ങള്‍ക്കു ശേഷം ബോക്‌സ്ഓഫിസില്‍ വിജയം നേടി. ചിത്രത്തിലെ നിവിന്റെ കഥാപാത്രവും ഏറെ ആഘോഷിക്കപ്പെട്ടിരുന്നു.

നയന്‍താര – നിവിന്‍ പോളി കോമ്പിനേഷനില്‍ ഒരുങ്ങുന്ന ഡിയര്‍ സ്റ്റുഡന്‍സ് എന്ന ചിത്രമാണ് അടുത്തതായി റിലീസിനൊരുങ്ങുന്നത്. ‘ലവ് ആക്ഷന്‍ ഡ്രാമ’യ്ക്കു ശേഷം നിവിന്‍ പോളിയും നയന്‍ താരയും വീണ്ടും ഒന്നിക്കുന്ന ചിത്രം ജോര്‍ജ് ഫിലിപ്പ് റോയ്, സന്ദീപ് കുമാര്‍ എന്നിവര്‍ ചേര്‍ന്ന് രചിച്ച് സംവിധാനം ചെയ്യുന്നു. ഒരു ഫീല്‍ഗുഡ് എന്റര്‍ടെയ്‌നറായിരിക്കും സിനിമ എന്നാണ് സൂചന.