മയക്കുമരുന്ന് സംഘങ്ങള്‍ തമ്മിൽ സംഘർഷം; യുവാവിനെ ഭാരതപ്പുഴയില്‍ കൊന്ന് തള്ളി

ചെറുതുരുത്തി: മയക്കുമരുന്നുസംഘങ്ങൾ തമ്മിലുണ്ടായ സംഘർഷത്തെ തുടർന്ന് യുവാവിനെ മർദിച്ച് കൊന്ന് ഭാരതപ്പുഴയിൽ തള്ളി. നിലമ്പൂർ വഴിക്കടവ് കുന്നുമ്മൽ സൈനുൽ ആബിദ് (39) ആണ് മരിച്ചത്. ചൊവ്വാഴ്‌ച രാവിലെയാണ് പുഴയിൽ മൃതദേഹം കണ്ടെത്തിയത്. വിദഗ്ധ പരിശോധനയിലാണ് കൊലപാതകം തെളിഞ്ഞത്.

സംഭവത്തിൽ ആറു പേരെ ചെറുതുരുത്തി പോലീസ് അറസ്റ്റു ചെയ്തു. ചെറുതുരുത്തി വെട്ടിക്കാട്ടിരി കലാമണ്ഡലത്തിനു സമീപം ലക്ഷംവീട് കോളനിയിൽ പാളയംകോട്ടക്കാരൻ വീട്ടിൽ ഷജീർ (33), സഹോദരൻ റജീബ് (30), ചെറുതുരുത്തി പുതുശ്ശേരി കമ്പനിപ്പടി ചോമയിൽ വീട്ടിൽ സുബൈർ (38), ചെറുതുരുത്തി ഗവ. ഹൈസ്‌കൂളിനു സമീപം കല്ലായിക്കുന്നത്ത് വീട്ടിൽ അഷ്റഫ് (26), ചെറുതുരുത്തി പുതുശ്ശേരി പള്ളിത്താഴത്ത് വീട്ടിൽ അബ്ദു‌ൾ ഷെഹീർ (29), പുതുശ്ശേരി കമ്പനിപ്പടി അന്തിയംകുളം വീട്ടിൽ മുഹമ്മദ് ഷാഫി (27) എന്നിവരെയാണ് അറസ്റ്റ് ചെയ്‌തത്. കോടതി ഇവരെ റിമാൻഡ് ചെയ്തു. മയക്കുമരുന്നു കേസുകൾ അടക്കം അനേകം കേസുകളിൽ പ്രതിയാണ് ഇവർ. ചിലരെ കാപ്പ നിയമപ്രകാരം നാടു കടത്തിയിട്ടുണ്ട്. ചിലർ ജയിലിൽനിന്ന് അടുത്തിടെ ഇറങ്ങിയതാണ്.