റാന്നിയിൽ വീട്ടുമുറ്റത്ത് നിർത്തിയിട്ട കാറിന് തീപിടിച്ചു

റാന്നി: വീട്ടുമുറ്റത്ത് നിർത്തിയിട്ട കാറിന് തീപിടിച്ചു. ഇന്ന് ഉച്ചയ്ക്ക് ഒന്നരയോടെ പാറേക്കടവിലാണ് സംഭവം. ഓട്ടം കഴിഞ്ഞു എത്തിയതിനു പിന്നാലെയാണ് കാർ തീപിടിച്ചു ഭാഗികമായി നശിച്ചത്. ഇടമുറി പാറേക്കടവ് ആലപ്പാട്ട് ജോയിയുടെ വീട്ടുമുറ്റത്താണ് കാറിനു അപ്രതീക്ഷിതമായി
തീ പിടിച്ചത്. പാലാ ഇളംകുളം സ്വദേശിയായ കൊല്ലംപറമ്പിൽ ജോജിയുടെ ഉടമസ്ഥതയിലുള്ളതാണ് കാർ.

ബന്ധുവീടായ ജോയിയുടെ വീട്ടിൽ എത്തിയതായിരുന്നു ജോജി. റാന്നിയിൽ പോയശേഷം തിരികെ വീട്ടിലെത്തിയപ്പോഴാണ് എൻജിൻ ഭാഗത്തുനിന്നും പുക ഉയരുന്നത് ശ്രദ്ധയിൽ പെട്ടത്. തീപിടിത്തത്തിൽ കാറിന്റെ എൻജിൻ ഭാഗം ഭാഗികമായി കത്തിനശിച്ചു. റാന്നിയിൽ നിന്നെത്തിയ അഗ്നിശമന സേനയും നാട്ടുകാരും ചേർന്ന് തീയണച്ചതിനാൽ കാർ പൂർണമായും കത്തിയില്ല. ഷോർട്ട് സർക്യൂട്ടായിരിക്കും കാരണമെന്നാണ് പ്രാഥമിക നിഗമനം.