എ.ടി.എമ്മിൽ പണം നിറക്കാൻ പോകുകയായിരുന്നയാളെ ആക്രമിച്ച് 25 ലക്ഷം കവർന്നു

കൊയിലാണ്ടി: ശനിയാഴ്‌ വൈകിട്ട് നാലോടെ കാട്ടിലപ്പീടികയിൽ നിർത്തിയിട്ട കാറിനുള്ളിൽ ആളെ കെട്ടിയിട്ടനിലയിൽ നാട്ടുകാർ കണ്ടതോടെയാണ് സംഭവം പുറത്തറിഞ്ഞത്. പയ്യോളി സ്വദേശി സുഹൈലാണ് ആക്രമിക്കപ്പെട്ടത്. കാറിലും മുഖത്തും മുളകുപൊടി വിതറി കാറിൻ്റെ സീറ്റുകൾക്കുള്ളിൽ കൈയും കാലും കെട്ടിയിട്ട നിലയിലായിരുന്നു. ഇന്ത്യ വൺ എ.ടി.എമ്മിൽ പണം നിറക്കാൻ ചുമതലയുള്ളയാളാണ് താനെന്നാണ് ഇയാൾ നാട്ടുകാരോട് പറഞ്ഞത്.രാവിലെ 11ഓടെ കൊയിലാണ്ടിയിലെ എ.ടി.എമ്മിൽനിന്ന് പണമെടുത്ത് അരിക്കുളം കുരുടിമുക്കിലെ എ ടി.എമ്മിൽ പോകവെ വഴിയിൽവെച്ച് ഒരു സ്ത്രീ വാഹനത്തിന് മുന്നിൽപെട്ടു. ഇവരെ വാഹനം തട്ടിയെന്ന് കരുതി പുറത്തിറങ്ങിയ സുഹൈലിനുനേരെ പർദ്ദ ധരിച്ചെത്തിയ ഒരുസംഘം ആക്രമിക്കുകയായിരുന്നു. തലക്കടിയേറ്റ് ബോധമറ്റനിലയിലായെന്നും ബോധം വന്നപ്പോഴാണ് കാട്ടിലപ്പീടികയിൽ കാറിൽ ഉപേക്ഷിക്കപ്പെട്ടനിലയിൽ കിടക്കുകയാണെന്ന് മനസ്സിലായതെന്നും ഇയാൾ പറഞ്ഞു കൊയിലാണ്ടി പൊലീസ് സ്ഥലത്തെത്തി പരിശോധന നടത്തി യുവാവിനെ താലൂക്കാശുപത്രിയിൽ കൊണ്ടുവന്ന് വൈദ്യപരിശോധന നടത്തി. അന്വേഷണം ശക്തമാക്കിയതായി പൊലീസ് പറഞ്ഞു.