സാമൂഹ്യ ഐക്യദാര്‍ഢ്യ പക്ഷാചരണത്തിന്റെ ഭാഗമായി സർക്കാരിന്റെ സൗജന്യ ആയുർവ്വേദ, ഹോമിയോ, യുനാനി, സിദ്ധ മെഡിക്കൽ ക്യാമ്പുകൾ നാളെ മുതൽ; മരുന്നുകൾ സൗജന്യം

തിരുവനന്തപുരം:.ആയുഷ് മെഡിക്കല്‍ ക്യാമ്പുകളുടെ സംസ്ഥാന തല ഉദ്ഘാടനം ഒക്‌ടോബര്‍ 14 ന് ഉച്ചയ്ക്ക് 12 മണിക്ക് തിരുവനന്തപുരം അയ്യന്‍കാളി ഹാളില്‍ ആരോഗ്യ വകുപ്പ് മന്ത്രി വീണാ ജോര്‍ജ് നിര്‍വഹിക്കും. പട്ടികജാതി പട്ടികവര്‍ഗ പിന്നോക്ക ക്ഷേമ വകുപ്പ് മന്ത്രി ഒ. ആര്‍. കേളു ചടങ്ങില്‍ അധ്യക്ഷത വഹിക്കും.ഒക്ടോബര്‍ 14 നാണ് ആയുഷ് മെഡിക്കല്‍ ക്യാമ്പുകൾ തുടങ്ങുക. ഒക്ടോബർ 14ന് ആരംഭിച്ച് ഈ മാസം തന്നെ മുഴുവന്‍ ആയുഷ് മെഡിക്കല്‍ ക്യാമ്പുകളും പൂര്‍ത്തിയാക്കും. ഇതിന് തക്കതായ നിലയിൽ എല്ലാ സജ്ജീകരണങ്ങളും ആയുഷ് വകുപ്പ് നടത്തിയിട്ടുണ്ട്. പട്ടിക ജാതി പട്ടിക വര്‍ഗ പിന്നോക്ക വിഭാഗ വികസന വകുപ്പുകളുടെ സഹകരണത്തോടെയാണ് ക്യാമ്പുകളുടെ നടത്തിപ്പ് പൂര്‍ത്തിയാക്കുക . സാമൂഹ്യ ഐക്യദാര്‍ഢ്യ പക്ഷാചരണത്തിന്റെ ഭാഗമായി ആയുഷ് വകുപ്പ് സംസ്ഥാനത്തൊട്ടാകെ ആയുഷ് മെഡിക്കല്‍ ക്യാമ്പുകള്‍ സംഘടിപ്പിക്കുന്നു. എല്ലാ ബ്ലോക്കുകളിലും ക്യാമ്പുകൾ നടക്കും. മാതൃ ശിശു ആരോഗ്യമാണ് ഈ ക്യാമ്പുകളുടെ പ്രത്യേക പരിഗണനാ വിഷയം. വിളര്‍ച്ചാ നിവാരണം, ജീവിത ശൈലീ രോഗങ്ങള്‍, വയോജന ആരോഗ്യം എന്നിവയ്ക്കും ഊന്നല്‍ നല്‍കും. സംസ്ഥാനത്തെ പ്രത്യേക പരിഗണന അര്‍ഹിക്കുന്ന പട്ടിക വര്‍ഗ വിഭാഗങ്ങളിലേക്ക് ഈ ക്യാമ്പുകള്‍ പ്രത്യേക ശ്രദ്ധ ചെലുത്തും.
ഏറ്റവും അര്‍ഹമായ പട്ടികജാതി, പട്ടികവര്‍ഗ മേഖലകള്‍ തെരഞ്ഞെടുത്ത് അവിടെ ക്യാമ്പ് നടത്തുകയാണ് ചെയ്യുക. ആയുര്‍വേദം ഉള്‍പ്പെടെയുള്ള ഭാരതീയ ചികിത്സാ ശാസ്ത്രങ്ങളുടെയും ഹോമിയോപ്പതിയുടെയും പ്രത്യേക മെഡിക്കല്‍ ക്യാമ്പുകളാണ് സംഘടിപ്പിക്കുക. ഒരു ബ്ലോക്കില്‍ 4 ക്യാമ്പുകള്‍ ഉണ്ടാകും. സംസ്ഥാനത്താകെ 608 ആയുഷ് മെഡിക്കല്‍ ക്യാമ്പുകളാണ് സംഘടിപ്പിക്കുന്നത്.പൂര്‍ണമായും സൗജന്യമായാണ് ഈ മെഡിക്കല്‍ ക്യാമ്പുകൾ നടത്തുക എന്ന പ്രത്യേകതയുണ്ട്. ഇവിടെ പൊതു ആരോഗ്യ പരിശോധനകളും മരുന്ന് വിതരണവും നടക്കും. ഇതു കൂടാതെ , പ്രാഥമിക ലബോറട്ടറി സേവനങ്ങള്‍, ബോധവത്ക്കരണ ക്ലാസുകള്‍, യോഗ പരിശീലനം എന്നിവയും ഉണ്ടാകും. ഇതില്‍ പങ്കെടുക്കുന്നവരുടെ തുടര്‍ ചികിത്സകള്‍ വിവിധ ആയുഷ് വകുപ്പിന്റേയും ആരോഗ്യ വകുപ്പിന്റേയും വിവിധ സ്ഥാപനങ്ങളിലൂടെ ഉറപ്പാക്കുകയും ചെയ്യും