ദുരന്ത ഭൂമിയിൽ നിന്ന് സ്കൂളിലേക്ക് .. ഇന്ന് മുണ്ടക്കൈ – ചൂരൽമല സ്‌കൂളുകളിലെ പുന:പ്രവേശനോത്സവം

കൽപ്പറ്റ : ഇന്ന് മുണ്ടക്കൈ – ചൂരൽമല സ്‌കൂളുകളിലെ പുന:പ്രവേശനോത്സവം . രാവിലെ 10 ന്  പൊതുവിദ്യാഭ്യാസ വകുപ്പ് മന്ത്രി വി ശിവൻകുട്ടി മേപ്പാടി ഗവ ഹയർ സെക്കൻഡറി സ്‌കൂളിൽ ഉദ്ഘാടനം നിർവ്വഹിക്കും . ഒപ്പം എസ് എസ് എൽ സി സർട്ടിഫിക്കറ്റുകളുടെ വിതരണവും നടത്തും .

വെള്ളാർമല ജി വി എച്ച് എസ് മേപ്പാടി ഗവ ഹയർസെക്കൻഡറി സ്‌കൂളിലും മുണ്ടക്കൈ ജി എൽ പി സ്‌കൂൾ മേപ്പാടി ഗ്രാമപഞ്ചായത്ത് കമ്മ്യൂണിറ്റി ഹാളിലുമായി വെള്ളാർമല സ്‌കൂളിലെ 546 കുട്ടികൾക്കും മുണ്ടക്കൈയിലെ 61 കുട്ടികൾക്കുമാണ് സൗകര്യം ഒരുക്കുക . മേപ്പാടി ഗവ ഹയർ സെക്കൻഡറി സ്‌കൂളിൽ നടക്കുന്ന പരിപാടിയിൽ പട്ടികജാതി – പട്ടികവർഗ്ഗ- പിന്നാക്കക്ഷേമ വികസന മന്ത്രി ഒ ആർ കേളു അദ്ധ്യക്ഷനാവും.

അതേസമയം കുട്ടികൾക്ക് പാഠ പുസ്തകങ്ങൾ റവന്യു വകുപ്പ് മന്ത്രി കെ രാജനും പഠനോപകരണങ്ങൾ പൊതുമരാമത്ത് മന്ത്രി പി എ മുഹമ്മദ് റിയാസും . യൂണിഫോം വിതരണം വനം-വന്യജീവി മന്ത്രി എ കെ ശശീന്ദ്രൻ നിർവ്വഹിക്കും. തുടർന്ന് ഐ ടി ഉപകരണങ്ങൾ ഐ സി ബാലകൃഷ്ണൻ എം എൽ എയും സ്‌കൂൾ ഗ്രാന്റ് വിതരണം ടി സിദ്ദിഖ് എംഎൽഎയും നിർവ്വഹിക്കും.
കൂടാതെ ജില്ലാ പഞ്ചായത്ത് പ്രസിഡന്റ് സംഷാദ് മരക്കാർ യാത്രാപാസ് വിതരണം ചെയ്യും. അതിന്റെ കൂടെ നഴ്‌സറി കുട്ടികൾക്കുള്ള കളിപ്പാട്ട വിതരണവും ജില്ലാ കളക്ടർ ഡി.ആർ മേഘശ്രീ നിർവ്വഹിക്കും .