സംസ്ഥാന വാർഷിക ജനറൽ ബോഡി യോഗം : മുഖ്യമായി വയനാട് ദുരന്താനന്തര സേവനപ്രവർത്തനങ്ങളും, പുനരധിവാസ പദ്ധതികളും

സംസ്ഥാന വാർഷിക ജനറൽ ബോഡി യോഗത്തിൽ വയനാട് ദുരന്താനന്തര സേവനപ്രവർത്തനങ്ങളും, പുനരധിവാസ പദ്ധതികളും അവലോകനം ചെയ്‌തു . ദേശീയ സേവാഭാരതി, കേരളത്തിലെ തിരഞ്ഞെടുക്കപ്പെട്ട മുഴുവൻ പ്രതിനിധികളെയും പങ്കെടുപ്പിച്ച് 2024 സെപ്റ്റംബർ 8 ഞായറാഴ്ച്ച രാവിലെ 9: 30 മുതൽ വൈകീട്ട് 4 മണി വരെയായിരുന്നു യോഗം നടന്നത് . യോഗo പ്രസിഡണ്ട് ഡോ. രഞ്ജിത്ത് വിജയഹരിയുടെ അദ്ധ്യക്ഷതയിൽ തൃശ്ശൂർ ഭാരതീയ വിദ്യാഭവൻ ഓഡിറ്റോറിയത്തിൽ വച്ച് നടന്നു . കേരളത്തിലെ 14 ജില്ലകളിലെ പ്രതിനിധികൾ പങ്കെടുക്കുന്ന പൊതുയോഗത്തിൽ ഒരു വർഷത്തെ പ്രവർത്തനം വിലയിരുത്തുകയും അടുത്ത വര്ഷത്തേയ്ക്കുള്ള ഭാരവാഹികളെ തിരഞ്ഞെടുത്ത് ഭാവി പ്രവർത്തന പദ്ധതി അവതരിപ്പിക്കുന്നതോടൊപ്പം പ്രതിനിധികൾക്ക് പരിശീലനങ്ങളും നടത്തും.

അതിൽ വയനാട് ജില്ലയിൽ മേപ്പാടി പഞ്ചായത്തിൽ മുണ്ടക്കൈ, ചൂരൽ മല, അട്ടമല പ്രദേശത്ത് ഉണ്ടായ ഉരുൾപ്പൊട്ടലുമായി ബന്ധപ്പെട്ട് സേവാഭാരതി 18 വിഭാഗങ്ങൾ കേന്ദ്രീകരിച്ച് സേവന പ്രവർത്തനങ്ങളിൽ പങ്കാളികളായി .അതിൽ 1500 ലധികം സന്നദ്ധ പ്രവർത്തകർ എത്തിച്ചേർന്നു. മേപ്പാടി CSI ചർച്ച്, മാതാ അമൃതാനന്ദമയിമഠം എന്നിവ കേന്ദ്രീകരിച്ച് സേവനകേന്ദ്രങ്ങളിലൂടെ 1000 ത്തിലധികം ദുരന്തബാധിതർക്ക് സേവാഭാരതി സഹായമായി .

ദുരന്തബാധിതരിൽ അവശേഷിക്കുന്നവർക്കായി കേന്ദ്ര-കേരള സർക്കാരുകൾ നടത്തിക്കൊണ്ടിരിക്കുന്ന പുനരധിവാസ പ്രവർത്തനങ്ങൾക്കൊപ്പം ദേശീയ സേവാഭാരതി കേരളഘടകവും ഒത്തുചേരുവാൻ നിശ്ചയിച്ചിട്ടുണ്ട്. മാത്രമല്ല പ്രസ്‌തുത പദ്ധതികളുടെ ഔദ്യോഗിക പ്രഖ്യാപനവും, കർമ്മ പദ്ധതിയും വാർഷിക പൊതുയോഗത്തിൽ അവതരിപ്പിച്ച് അംഗീകാരവും നേടുന്നതാണ്.

വയനാട് ദുരന്താനന്തര പുനരധിവാസ പദ്ധതികൾ

തലചായ്ക്കാനൊരിടം പദ്ധതിയിലൂടെ ഭവന നിർമ്മാണവും, ഭൂദാനം പദ്ധതിയിലൂടെ അഞ്ച് ഏക്കർ ഭൂമി സമാഹരണം നടത്തി അർഹതപ്പെട്ടവർക്ക് ഭൂമിയും, വീടും നൽകും. വിദ്യാർത്ഥികൾക്ക് നിരന്തരമായ പഠന സൗകര്യങ്ങളും താമസ സൗകര്യങ്ങളും ലഭ്യമാക്കും. ദുരിത ബാധിതർക്ക് മാനസിക പരിചരണത്തിന് പുനർജ്ജനി കൗൺസിലിംഗ് സെന്റർ വഴിയും ആരോഗ്യ പ്രശ്നങ്ങൾക്ക് സേവാഭാരതിയുടെ പാലിയേറ്റിവ് സംവിധാനങ്ങൾ വഴിയും സാന്ത്വനമേകാൻ പരിശ്രമിക്കും. സ്വയം തൊഴിൽ കണ്ടെത്തുവാനുള്ള സാമഗ്രികളും സൗകര്യങ്ങളും നൈപുണ്യ വികസന പരിശീലനങ്ങളും ലഭ്യമാക്കും.

ദുരന്താനന്തരം ഒറ്റപ്പെട്ട് പോയവർക്ക് പ്രായഭേദമന്യേ സേവാഭാരതി നടത്തിക്കൊണ്ടിരിക്കുന്ന സ്ഥാപനങ്ങളിലൂടെ ആജീവനാന്ത സംരക്ഷണം ഉറപ്പ് വരുത്തും. കേരളത്തിലെ എല്ലാ ജില്ലകളിലും സേവാഭാരതിയുടെ ആപത് സേവാ (Disaster Management) പരിശീലനം ഊർജിതപ്പെടുത്തി കൂടുതൽ പ്രവർത്തകരെ സജ്ജമാക്കും. മേൽപ്പറഞ്ഞ ഓരോ പ്രവർത്തനങ്ങളുടേയും പൂർത്തീകരണത്തിനായി പത്ര – ദൃശ്യ മാധ്യമ സുഹൃത്തുക്കളുടെ അകമഴിഞ്ഞ സഹായ സഹകരണങ്ങൾ പ്രതീക്ഷിച്ചുകൊള്ളുന്നു