തിരൂരിൽ 12 ഗ്രാം എംഡിഎംഎയുമായി രണ്ടു യുവാക്കൾ അറസ്റ്റിൽ

മലപ്പുറം: തിരൂരിൽ മാരക രാസലഹരിയുമായി രണ്ടു യുവാക്കൾ അറസ്റ്റിൽ. വെട്ടം പച്ചാട്ടിരി സ്വദേശി കൂലിപ്പറമ്പിൽ ശ്രീജിത്ത്, മാങ്ങാട്ടിരി തെക്കുമുറി സ്വദേശി പുതിയത്ത് മുഹമ്മദ് സാദിഖ് എന്നിവരാണ് പിടിയിലായത്. തിരൂർ ഡിവൈഎസ്പി കെ.എം. ബിജുവിന്റെ മേൽനോട്ടത്തിൽ നടത്തിയ പരിശോധനകളിലാണ് ഇരുവരും പിടിയിലായത്.

പരിശോധയിൽ 12 ഗ്രാം എംഡിഎംഎയുമായി ശ്രീജിത്ത് പിടിയിലായത്. ഓട്ടോറിക്ഷയിൽ യാത്ര ചെയ്യുമ്പോഴാണ് അന്വേഷണ സംഘം ഇയാളെ പിടികൂടിയത്. വെള്ളിയാഴ്ച രാവിലെ നടത്തിയ പരിശോധനയിലാണ് 8 ഗ്രാം രാസലഹരിയുമായി മുഹമ്മദ് സാദിഖിനെ തിരൂർ ഇൻസ്പെക്ടർ ജിനേഷ് കെ ജെ, സബ് ഇൻസ്പെക്ടർ സുജിത്ത് ആർ.പി. എന്നിവർ ചേർന്ന് അറസ്റ്റ് ചെയ്തത്.

മാങ്ങാട്ടിരി,പച്ചാട്ടിരി പ്രദേശങ്ങളിൽ യുവാക്കൾക്കിടയിൽ മാരകമായ രാസലഹരിയുടെ വിപണനം നടക്കുന്നുണ്ടെന്ന രഹസ്യവിവരത്തിന്റെ പശ്ചാത്തലത്തിൽ തിരൂർ ഡിവൈഎസ്പിയുടെ നേതൃത്വത്തിലുള്ള ഡാൻസാഫ് ടീമിനെ നിയോഗിക്കുകയും മേഖലയിൽ പരിശോധനകൾ ഊർജ്ജിതമാക്കുകയും ചെയ്തിരുന്നു. വിഷയത്തിൽ തുടർ പരിശോധനകൾ നടത്തുമെന്നും മയക്കുമരുന്ന് സംഘങ്ങളെപ്പറ്റി പൊതുജനങ്ങളിൽ നിന്ന് ലഭിക്കുന്ന വിവരങ്ങളടക്കം ശേഖരിച്ച് നിയന്ത്രിക്കുവാനുള്ള നടപടികളും സ്വീകരിച്ചു കഴിഞ്ഞതായും പോലീസ് അറിയിച്ചു.