നാടൻ തോക്കും തിരയുമായി ഒരു സംഘം; സംശയാസ്പദമായ സാഹചര്യത്തിൽ മൂന്ന് പേർ പൊലീസ് പിടിയിൽ

കോഴിക്കോട്: സംശയാസ്പദമായ സാഹചര്യത്തിൽ നാടൻ തോക്കും തിരയുമായി എത്തിയ സംഘത്തെ ബാലുശ്ശേരി പൊലീസ് പിടികൂടി. എസ്റ്റേറ്റ്മുക്ക് സ്വദേശികളായ മൊക്കായിക്കൽ അനസ്, കോട്ടക്കുന്നുമ്മൽ ഷംസുദ്ദീൻ, തലയാട് സ്വദേശി തൈക്കണ്ടി സുനിൽ കുമാർ എന്നിവരാണ് പിടിയിലായത്. ഞായറാഴ്ച പുലർച്ചെയോടെയാണ് ബാലുശ്ശേരി കാഞ്ഞിക്കാവ് പ്രദേശത്ത് സംശയാസ്പദമായ സാഹചര്യത്തിൽ മൂന്ന് പേരെയും കണ്ടതിനെ തുടർന്ന് നാട്ടുകാർ പൊലീസിൽ വിവരം അറിയിക്കുകയായിരുന്നു.

ബാലുശ്ശേരി ഇൻസ്‌പെക്ടർ മഹേഷ് കണ്ടമ്പേത്തിന്റെ നേതൃത്വത്തിൽ പൊലീസ് എത്തിയാണ് ഇവരെ കസ്റ്റഡിയിലെടുത്തത്. ഇവരുടെ പക്കൽ നിന്നും നാടൻ തോക്ക്, തിര, കത്തി, മൂന്ന് ടോർച്ചുകൾ മുതലായവ കണ്ടെടുത്തിട്ടുണ്ട്. ഇവർ നായാട്ടിനായി ഇറങ്ങിയതാണെന്ന് സംശയിക്കുന്നതായി പോലീസ് പറഞ്ഞു. പേരാമ്പ്ര കോടതിയിൽ ഹാജരാക്കിയ പ്രതികളെ റിമാൻഡ് ചെയ്തു.