വനിതാ ഓട്ടോഡ്രൈവറെ മർദിച്ച സംഭവം : രണ്ടുപേർ പോലീസ് പിടിയിൽ

കൊച്ചി: വനിതാ ഓട്ടോഡ്രൈവറെ മർദിച്ച സംഭവത്തിൽ രണ്ടുപേർ പോലീസ് പിടിയിൽ. ബന്ധുവായ സജീഷാണ് ഓട്ടോ ഡ്രൈവറായ ജയയെ മര്‍ദിക്കാന്‍ വേണ്ടി ക്വട്ടേഷന്‍ കൊടുത്തതെന്നും അത് കുടുംബവഴക്കാണ് ക്വട്ടേഷന്‍ നൽകാൻ കാരണമായതെന്നുമാണ് ലഭിച്ച വിവരം. ജയയെ ആക്രമിച്ചതിന് ശേഷം സജീഷ് ഒളിവില്‍പോവുകയായിരുന്നു.

ഈ സംഭവവുമായി ബന്ധപ്പെട്ട് സജീഷിന്റെ ഭാര്യ ഉള്‍പ്പെടെ രണ്ടുപേരെ പോലീസ് കസ്റ്റഡിയിലെടുത്തിട്ടുണ്ട്. സജീഷിന്റെ ഭാര്യയ്ക്കും ക്വട്ടേഷന്‍ നല്‍കിയത് സംബന്ധിച്ച് അറിവുണ്ടായിരുന്നതായാണ് സൂചന .

ഓട്ടംവിളിച്ച മൂന്ന് യുവാക്കള്‍ ചേർന്നാണ് കഴിഞ്ഞ ദിവസം രാത്രി ജയയെ ക്രൂരമായി മര്‍ദിച്ചത്. ആക്രമണത്തില്‍ വാരിയെല്ലിനും നട്ടെല്ലിനും ഗുരുതരമായി പരിക്കേറ്റ ജയ സ്വകാര്യ ആശുപത്രിയില്‍ ചികിത്സയിലാണ്.

കടപ്പുറം ബദരിയ പള്ളിയുടെ വടക്കുവശത്തുവെച്ചാണ് ജയ ആക്രമിക്കപ്പെട്ടത് .ജയയുടെ ഓട്ടോയിൽ ഒരു യുവാവ് ആശുപത്രിയിലേക്ക് ഓട്ടംവിളിക്കുകയായിരുന്നു. കുറച്ച് ദൂരം ചെന്നപ്പോൾ ചെറായിയില്‍ എത്തിയ സമയത്ത് രണ്ട് സുഹൃത്തുക്കളേക്കൂടി ഇയാള്‍ ഓട്ടോയില്‍ കയറ്റി. തുടര്‍ന്ന് നാലിടങ്ങളിലേക്ക് ഇവര്‍ ഓട്ടംപോയി. പിന്നീട് ഒരു പത്തുമണിയായതോടെ രാത്രി ഇനിയും ഓട്ടംതുടരാന്‍ കഴിയില്ലെന്നും മറ്റൊരു വാഹനം ഏര്‍പ്പാടാക്കിത്തരാമെന്നും ജയ പറഞ്ഞതോടെ യുവാക്കള്‍ പ്രകോപിതരായി. ശേഷം മൂവരും ചേര്‍ന്ന് യുവതിയെ ക്രൂരമായി മര്‍ദിക്കുകയായിരുന്നു.