ഭാരതമാതാവ് എന്നത് ചിത്രകാരന്റെ സങ്കല്‍പം, ഗവര്‍ണര്‍ ചെയ്തത് അംഗീകരിക്കാനാവില്ല: എം എ ബേബി

തിരുവനന്തപുരം: കേരള ഗവര്‍ണര്‍ രാജേന്ദ്ര ആര്‍ലേക്കറുടെ നടപടി അംഗീകരിക്കാന്‍ കഴിയില്ലെന്ന് സിപിഐഎം ജനറല്‍ സെക്രട്ടറി എം എ ബേബി. ഗവര്‍ണര്‍ ചെയ്തത് ചെയ്യാന്‍ പാടില്ലാത്ത കാര്യമാണ്. ഭാരതമാതാവ് എന്നത് ചിത്രകാരന്റെ സങ്കല്‍പമാണെന്നും എം എ ബേബി പറഞ്ഞു. ഗവര്‍ണര്‍ ഭരണഘടനാ പദവി ദുരുപയോഗം ചെയ്യുകയാണെന്നും എം എ ബേബി പറഞ്ഞു. രാജ്ഭവനെ രാഷ്ട്രീയ വേദിയാക്കരുതെന്നും എം എ ബേബി അഭിപ്രായപ്പെട്ടു.

ഗവര്‍ണറെ തിരിച്ചു വിളിക്കണമെന്ന സിപിഐ നിലപാടിനോടും എം എ ബേബി പ്രതികരിച്ചു. ഓരോ പാര്‍ട്ടിക്കും അവരുടേതായ നിലപാടുണ്ടെന്ന് എം എ ബേബി പറഞ്ഞു. സിപിഐയോട് സിപിഐഎമ്മിന് മത്സരമില്ല. ഗവര്‍ണര്‍ക്കെതിരെ സിപിഐ കൂടുതല്‍ ശക്തമായ നിലപാട് സ്വീകരിക്കുന്നുണ്ടെങ്കില്‍ അതിനെ സ്വാഗതം ചെയ്യുന്നുവെന്നും എം എ ബേബി പറഞ്ഞു.

ഭാരതാംബ വിവാദത്തില്‍ സിപിഐ രാഷ്ട്രപതി ദ്രൗപതി മുര്‍മുവിന് പരാതി നല്‍കിയിട്ടുണ്ട്. ഗവര്‍ണറുടേത് ഭരണഘടനാ വിരുദ്ധ നടപടിയാണെന്ന് ചൂണ്ടിക്കാട്ടി സിപിഐ എംപി സന്തോഷ് കുമാറാണ് രാഷ്ട്രപതിക്ക് പരാതി നല്‍കിയത്. ഗവര്‍ണറെ തിരിച്ചുവിളിക്കണമെന്നും സിപിഐ ആവശ്യപ്പെട്ടിരുന്നു.