റോഡുകളിൽ പെരുന്നാൾ നമസ്കാരം നിർവഹിക്കുന്നവർക്കെതിരെ കർശന നടപടി

ലക്നൗ: റോഡുകളിൽ പെരുന്നാൾ നമസ്കാരം നിർവഹിക്കുന്നവർക്കെതിരെ കർശന നടപടിയെന്ന മുന്നറിയിപ്പുമായി മീററ്റ് പൊലീസ്. ഈദ്-ഉൽ-ഫിത്തർ നിസ്‌കാരത്തിനായി റോഡുകൾ കയ്യടക്കുന്നവരുടെ പാസ്പോർട്ട് റ​ദ്ദാക്കുമെന്നാണ് പൊലീസ് വ്യക്തമാക്കുന്നത്. പ്രത്യേകം തയ്യാറാക്കുന്ന ഈദ്ഗാഹിനുള്ളിൽ നമസ്കാരത്തിന് തടസമില്ലെന്നും പൊലീസ് പറഞ്ഞു. അതേസമയം, തെരുവുകളും റോഡുകളുമൊന്നും കയ്യടക്കി നിസ്കാരം നടത്താൻ അനുവദിക്കില്ലെന്നും പൊലീസ് മുന്നറിയിപ്പ് നൽകുന്നു.

ഈ വർഷത്തെ ഈദ് പ്രാർത്ഥനകൾ അടുത്തുള്ള പള്ളികൾ, ഫൈസ്-ഇ-ആം ഇന്റർ കോളേജ് തുടങ്ങിയ നിയുക്ത സ്ഥലങ്ങളിൽ മാത്രമായി പരിമിതപ്പെടുത്തുമെന്ന് എസ്പി സിറ്റി ആയുഷ് വിക്രം സിംഗ് പറഞ്ഞു . പൊതു റോഡുകളിൽ ഇത്തരം കാര്യങ്ങൾ അനുവദിക്കില്ല. അത്തരം പ്രവർത്തനങ്ങളിൽ ഏർപ്പെട്ടിരിക്കുന്ന വ്യക്തികളുടെ പാസ്‌പോർട്ട് റദ്ദാക്കും. റോഡുകളിൽ പ്രാർത്ഥന നടത്തി പൊതുസമാധാനം തകർക്കാൻ ശ്രമിക്കുന്നവർക്ക് മക്ക, മദീന പോലുള്ള സ്ഥലങ്ങളിലേക്ക് പോകാൻ കഴിയില്ലെന്ന് ഉറപ്പാക്കും. അവരുടെ കുറ്റകൃത്യങ്ങളും രേഖപ്പെടുത്തപ്പെടും.ഇതിനുപുറമെ, മുൻ വർഷങ്ങളിലെ കേസുകളും ചാർജ്ജ് ചെയ്യുമെന്നും അദ്ദേ​ഹം വ്യക്തമാക്കി.

മതപരമായ പരിപാടിക്കിടെ ഉണ്ടാകുന്ന അസ്വസ്ഥതകൾ തടയുന്നതിനുള്ള വിശാലമായ സുരക്ഷാ സംരംഭത്തിന്റെ ഭാഗമായാണ് ഈ തീരുമാനം. ഈദ്ഗാഹ് പോലുള്ള പ്രധാന സ്ഥലങ്ങളിൽ പോലീസിനെയും അർദ്ധസൈനിക വിഭാഗങ്ങളെയും വിന്യസിക്കും . കൂടാതെ ഡ്രോണുകളും വീഡിയോ ക്യാമറകളും ഉൾപ്പെടെയുള്ള അധിക നിരീക്ഷണ നടപടികളും ഏർപ്പെടുത്തും. ഉത്സവകാലത്ത് ക്രമസമാധാനം നിലനിർത്തുന്നതിനാണ് ഈ സുരക്ഷാ പ്രോട്ടോക്കോൾ ലക്ഷ്യമിടുന്നത്.

പൊതു റോഡുകളിലോ സ്ഥലങ്ങളിലോ മതപരമായ പ്രവർത്തനങ്ങൾ അനുവദിക്കില്ലെന്നാണ് പൊലീസ് വ്യക്തമാക്കുന്നത്. അത്തരം സന്ദർഭങ്ങളുണ്ടായാൽ മുൻകൂർ ഔദ്യോഗിക അനുമതി നേടണം. നിയമലംഘകർക്കെതിരെ കർശന നടപടി സ്വീകരിക്കും. അറസ്റ്റ് ചെയ്യാനുള്ള സാധ്യത ഉൾപ്പെടെയുള്ള അടിയന്തര നിയമനടപടികൾ നേരിടേണ്ടിവരുമെന്നും അധികൃതർ അറിയിച്ചു.