ഇന്ത്യയിൽ ഇവി വാഹനങ്ങൾ നിർമിക്കാനുള്ള പദ്ധതി ഉപേക്ഷിക്കാൻ ഒരുങ്ങി ജഗ്വാർ ലാൻഡ് റോവർ

ഇന്ത്യയിൽ വൈദ്യുത വാഹനങ്ങൾ നിർമിക്കാനുള്ള പദ്ധതി ഉപേക്ഷിക്കാൻ ഒരുങ്ങുകയാണ് ജഗ്വാർ ലാൻഡ് റോവർ. ടെസ്‌ല വിവിധ ചൈനീസ് കമ്പനികളും ഇന്ത്യൻ വിപണിയിൽ പ്രവേശിക്കാനൊരുങ്ങുന്ന സാഹചര്യത്തിലാണ് ടാറ്റയുടെ പിൻമാറ്റമെന്നത് ശ്രദ്ധേയമാണ്.

അതേസമയം പ്രാദേശികമായി മികച്ച ഗുണനിലവാരത്തിലും അനുയോജ്യമായ വിലയിലും ഘടകങ്ങൾ ലഭിക്കാൻ ബുദ്ധിമുട്ട് ഉണ്ടാവുന്നതുകൊണ്ടാണ് പിന്മാറ്റമെന്നാണ് റിപ്പോർട്ടുകൾ സൂചിപ്പിക്കുന്നത്. വൈദ്യുത കാറുകൾക്ക് ആവശ്യം കുറയുന്നതും പദ്ധതിയിൽ നിന്ന് പിൻമാറാൻ ജഗ്വാർ ലാൻഡ് റോവറിനെ പ്രേരിപ്പിക്കുന്ന ഘടകമാണ്.

കഴിഞ്ഞ വർഷമാണ് ടാറ്റ മോട്ടോഴ്സ് തമിഴ്നാട്ടിലൊരുക്കുന്ന ഫാക്ടറിയിൽ ജഗ്വാർ ലാൻഡ് റോവറിന്റെ വൈദ്യുത വാഹനങ്ങൾ ഉത്പാദിപ്പിക്കാൻ പോകുന്നതായുള്ള പ്രഖ്യാപനം വന്നത്. 8,708 കോടി രൂപ ചെലവിലാണ് തമിഴ്നാട്ടിൽ ഫാക്ടറി ഒരുക്കുന്നത് എന്നായിരുന്നു റിപ്പോർട്ടുകൾ.