ഐ.പി. എൽ: സൺ റൈസേഴ്സ് ഹൈദരാബാദിന് വേണ്ടി കളത്തിലിറങ്ങാൻ തയ്യാറെടുത്ത് ഇഷാൻ കിഷൻ

ഇന്ത്യൻ പ്രീമിയർ ലീഗ് 2025 സീസണിൽ സൺ റൈസേഴ്സ് ഹൈദരാബാദിന് വേണ്ടി കളത്തിലിറങ്ങുന്ന ഇഷാൻ കിഷൻ മികച്ച സീസണിനുള്ള തയാറെടുപ്പിലാണ്. മുംബൈ ഇന്ത്യൻസിൽ നിന്നും പുറത്തായ താരം സൺറൈസേഴ്‌സ് ഹൈദരാബാദിന്റെ ഇൻട്രാ-സ്ക്വാഡ് മത്സരത്തിൽ മികച്ച പ്രകടനം കാഴ്ചവച്ചു.

2025 ലെ ഐപിഎൽ മെഗാ ലേലത്തിൽ ഇഷാൻ കിഷന് വേണ്ടി കടുത്ത ലേല പോരാട്ടമാണ് നടന്നത്. 2 കോടി രൂപയിൽ നിന്നാണ് കിഷന്റെ ലേലം ആരംഭിച്ചത്. ഒടുവിൽ 11.25 കോടി രൂപയ്ക്ക് സൺറൈസേഴ്‌സ് ഹൈദരാബാദ് താരത്തെ വാങ്ങി.

2023-ൽ ദക്ഷിണാഫ്രിക്കൻ പരമ്പരയുടെ മധ്യത്തിൽ ഇഷാൻ കിഷൻ ടീമിൽ നിന്ന് പുറത്തായതിനെത്തുടർന്ന് ബിസിസിഐയുടെ കരാറിൽ നിന്നും പുറത്താക്കപ്പെട്ടു. ശേഷം ആഭ്യന്തര ക്രിക്കറ്റിലേക്ക് മടങ്ങി മിന്നും പ്രകടനം കാഴ്ച വെച്ചെങ്കിലും ടീമിലേക്ക് തിരിച്ചെത്താൻ കഴിഞ്ഞില്ല. ഐപിഎല്ലിൽ മികച്ച പ്രകടനം നടത്തി ദേശീയ ടീമിൽ തിരികെയെത്തുക എന്നതാണ് ഇഷാൻ കിഷന്റെ ലക്ഷ്യം.