രാജസ്ഥാൻ റോയൽസിന് കനത്ത തിരിച്ചടി; സന്ദീപ് ശർമയ്ക്ക് സീസൺ നഷ്ടമാകും

ഇന്ത്യൻ പ്രീമിയർ ലീഗിൽ രാജസ്ഥാൻ റോയൽസിന് കനത്ത തിരിച്ചടി. സന്ദീപ് ശർമയ്ക്ക് സീസണിലെ അവശേഷിച്ച മത്സരങ്ങൾ നഷ്ടമാകും. ​വിരലിനേറ്റ പരിക്കാണ് താരത്തിന് വില്ലനായത്. ഗുജറാത്ത് ടൈറ്റൻസിനെതിരായ മത്സരത്തിനിടെയാണ് സന്ദീപ് ശർമയ്ക്ക് പരിക്കേറ്റത്.

അതേസമയം​ ഗുജറാത്ത് ടൈറ്റൻസിനെതിരായ മത്സരത്തിൽ വിരലിന് പരിക്കേറ്റിട്ടും പന്തെറിയാൻ സന്ദീപ് കാണിച്ച അസാമാന്യ ധൈര്യം പ്രശംസനീയമാണ്. രാജസ്ഥാൻ റോയൽസിലെ എല്ലാവരും സന്ദീപിന് വേഗത്തിലുള്ള രോഗമുക്തി ആശംസിക്കുന്നു. രാജസ്ഥാൻ റോയൽസ് പ്രസ്താവനയിലൂടെ അറിയിച്ചു.

ഈ സീസണിൽ സന്ദീപിന് മികച്ച പ്രകടനം പുറത്തെടുക്കാൻ സാധിച്ചിരുന്നില്ല. രാജസ്ഥാനായി 10 മത്സരങ്ങൾ കളിച്ച സന്ദീപ് ഒമ്പത് വിക്കറ്റുകളാണ് വീഴ്ത്തിയത്. 9.89 ആണ് താരത്തിന്റെ എക്കണോമി. മുംബൈ ഇന്ത്യൻസിനെതിരെ ഇന്നലെ നടന്ന മത്സരത്തിൽ ആകാശ് മദ്‍വാളാണ് സന്ദീപിന് പകരം ഇറങ്ങുന്നത്.

കഴിഞ്ഞ ദിവസം രാജസ്ഥാൻ റോയൽസിനെതിരായ മത്സരത്തിൽ ആദ്യം ബാറ്റ് ചെയ്ത മുംബൈ ഇന്ത്യൻസ് നിശ്ചിത 20 ഓവറിൽ രണ്ട് വിക്കറ്റ് നഷ്ടത്തിൽ 217 റൺസെടുത്തു. റയാൻ റിക്ലത്തൺ 61, രോഹിത് ശർമ 53, സൂര്യകുമാർ യാദവ്, ​ഹാർദിക് പാണ്ഡ്യ എന്നിവർ പുറത്താകാതെ 48 റൺസ് എടുത്തു. ട്രെന്‍ഡ് ബോള്‍ട്ടും ജസ്പ്രീത് ബുമ്രയും ദീപക് ചഹറും ഹാര്‍ദിക് പാണ്ഡ്യയും ഉള്‍പ്പെട്ട മുംബൈയുടെ പേസ് അറ്റാക്കിന് മുന്നില്‍ രാജസ്ഥാന്റെ ബാറ്റിംഗ് നിര ചീട്ട് കൊട്ടാരം പോലെ തകരുകയായിരുന്നു.