സാംസങ് അൾട്രാ-തിൻ ഫോൺ: ഗാലക്‌സി എസ്25 എഡ്‍ജ് ഏപ്രിലിൽ എത്തും

സാംസങ് അൾട്രാ-തിൻ ഗാലക്‌സി എസ്25 എഡ്‍ജ് സ്മാർട്ട്‌ഫോൺ ഏപ്രിലിൽ പുറത്തിറക്കുമെന്ന് റിപ്പോർട്ടുകൾ. ഗാലക്‌സി എസ്25 എഡ്‍ജ് അനാച്ഛാദനം ചെയ്യുന്നതിനായി ഏപ്രിൽ 16ന് സാംസങ് ഒരു ഓൺലൈൻ പരിപാടി നടത്താൻ ഒരുങ്ങുന്നതായാണ് വിവരം. ഗാലക്‌സി എസ്25 എഡ്‍ജ് ഫോണിന്‍റെ വിൽപ്പന മെയ് മാസത്തിൽ ആരംഭിക്കുമെന്ന് പ്രതീക്ഷിക്കുന്നു.

ജനുവരിയിൽ നടന്ന ഗാലക്‌സി അൺപാക്ക്ഡ് ഇവന്‍റിൽ കമ്പനി അൾട്രാ-സ്ലിം മോഡലിന്‍റെ പ്രിവ്യൂ പ്രദർശിപ്പിച്ചിരുന്നു. വിശദാംശങ്ങൾ പരിമിതമാണെങ്കിലും, ഗാലക്‌സി എസ്25 എഡ്ജ് ഗാലക്‌സി എസ്25 സീരീസിന്‍റെ മറ്റ് ഭാഗങ്ങളെ അപേക്ഷിച്ച് കൂടുതൽ സ്ലിം ആയിരിക്കുമെന്ന് പ്രതീക്ഷിക്കുന്നു.

സാംസങ് ഗാലക്‌സി എസ്25 എഡ്ജിന്‍റെ ഒരു ഡമ്മി മോഡൽ പ്രദർശിപ്പിച്ചിരുന്നു. ഇതിനുസരിച്ച് പിന്നിൽ ഒരു ഡ്യുവൽ ക്യാമറ സജ്ജീകരണം ലഭിക്കുന്നു. അടിസ്ഥാന ഗാലക്‌സി എസ്25 മോഡലുകളേക്കാൾ വളരെ കനം കുറഞ്ഞതായി ഈ സ്മാർട്ട്‌ഫോൺ കാണപ്പെടുന്നു. 5.84 എംഎം ആണ് ഇതിന്‍റെ കനം. ബാറ്ററി ശേഷിയിലും ക്യാമറ കോൺഫിഗറേഷനിലുമുള്ള മാറ്റങ്ങൾ കാരണം ഇത് ഭാരം കുറഞ്ഞതായിരിക്കുമെന്നും പ്രതീക്ഷിക്കുന്നു.

വലിയ ഡിസ്‌പ്ലേയായിരിക്കും എഡ്‍ജ് മോഡലിൽ ഉണ്ടാവുക എന്നാണ് റിപ്പോർട്ട്. പ്ലസ് വേരിയന്‍റിന്‍റെ 6.7 ഇഞ്ച് സ്‌ക്രീൻ വലുപ്പത്തോട് അടുത്ത വലിപ്പം ഇതിനും ലഭിക്കും. എങ്കിലും, ബാറ്ററി ശേഷിയിലെ വ്യത്യാസങ്ങൾ കാരണം അടിസ്ഥാന മോഡലിന് സമാനമായി ഏകദേശം 162 ഗ്രാം ഭാരം പ്രതീക്ഷിക്കുന്നു. മറ്റ് എസ്25 മോഡലുകളേക്കാൾ ചെറുതായ 3,900 എംഎഎച്ച് ബാറ്ററിയാണ് എസ്25 എഡ്‍ജിൽ സജ്ജീകരിച്ചിരിക്കുന്നതെന്ന് റിപ്പോർട്ടുണ്ട്.