താമരശ്ശേരി ചുരത്തിലെ എട്ടാം വളവിൽ സംരക്ഷണ ഭിത്തിക്കരികിൽ നിന്നു; കാൽ വഴുതി കൊക്കയിലേക്ക് വീണ് യുവാവിന് ​ഗുരുതര പരിക്ക്

കോഴിക്കോട്: താമരശ്ശേരി ചുരത്തിൽ ഹെയർപിൻ വളവിൽ നിന്നും താഴെ കൊക്കയിലേക്ക് വീണ് യുവാവ്. ചുരത്തിലെ എട്ടാം വളവിൽ നിന്നും വീണ യുവാവിന് ഗുരുതരമായി പരിക്കേറ്റു. മലപ്പുറം കൂട്ടിലങ്ങാടി സ്വദേശി ഫാഹിസാണ് ചുരത്തിൽ നിന്ന് കൊക്കയിലേക്ക് വീണ് പരിക്കേറ്റത്. സംരക്ഷണ ഭിത്തിക്കരികിൽ നിന്ന ഫാഹിസ് കാൽ വഴുതി താഴേക്ക് വീഴുകയായിരുന്നു. വയനാട് വിവാഹ ചടങ്ങിൽ പങ്കെടുത്തു മടങ്ങവെയാണ് യുവാവ് കൊക്കയിൽ വീണത്. ​ഗുരുതരമായി പരിക്കേറ്റ യുവാവിനെ താമരശ്ശേരി താലൂക്ക് ആശുപത്രിയിൽ പ്രവേശിപ്പിച്ചു.

കോഴിക്കോട് ജില്ലയിലെ താമരശ്ശേരിക്കടുത്ത് അടിവാരത്തുനിന്നു തുടങ്ങുന്ന 12 കിലോമീറ്ററോളം ദൈർഘ്യമുള്ള ഈ വഴിയിൽ കഠിനമായ 9 ഹെയർ പിൻ വളവുകളാണുള്ളത്. തെക്ക് വടക്ക് ദിശയിലാണ് ഈ ചുരം റോഡ്‌ സ്ഥിതി ചെയ്യുന്നത്. ഇതിൽ എട്ടാം വളവിൽ നിന്നാണ് യുവാവ് കാൽ വഴുതി താഴേക്ക് വീണത്.