റമദാൻ: അബുദാബിയിൽ ഹെവി വാഹനങ്ങൾക്ക് നിയന്ത്രണം

അബുദാബിയിൽ ഹെവി വാഹനങ്ങൾക്ക് പുതിയ നിയന്ത്രണങ്ങൾ ഏർപ്പെടുത്തി അബുദാബി മൊബിലിറ്റി. റമദാൻ ആരംഭിക്കുന്നതിനോടനുബന്ധിച്ചാണ് നിയന്ത്രണം ഏർപ്പെടുത്തിയത്. ചരക്ക് ട്രക്കുകൾ, ടാങ്കറുകൾ, നിർമാണ പ്രവൃത്തികൾക്ക് ഉപയോഗിക്കുന്ന വാഹനങ്ങൾ എന്നിവയുൾപ്പടെയുള്ള ഹെവി വാഹനങ്ങളുടെ ​ഗതാ​ഗത സമയത്തിലാണ് നിയന്ത്രണം.

തിങ്കൾ മുതൽ വ്യാഴം വരെ രാവിലെ 8 മണി മുതൽ 10 മണി വരെയും ഉച്ചയ്ക്ക് 2 മണി മുതൽ വൈകിട്ട് 4 മണി വരെയുമാണ് ഹെവി വാഹനങ്ങൾക്ക് ​റോഡുകളിൽ നിയന്ത്രണമുള്ളത്. വെള്ളിയാഴ്ചകളിൽ മറ്റ് പ്രവൃത്തി ദിവസങ്ങളിലെ പോലെയുള്ള സമയങ്ങളിലും അധികമായി വൈകുന്നേരം 8 മണി മുതൽ രാത്രി 1 മണി വരെയും നിയന്ത്രണം ഏർപ്പെടുത്തിയിട്ടുണ്ട്.

അതേസമയം റമദാനിൽ അബുദാബിയിലെ റോ‍ഡുകളിലെ ​ഗതാ​ഗതം സു​ഗമമാക്കുന്നതിനായാണ് ഇപ്പോഴുള്ള നിയന്ത്രണം. തിരക്കേറിയ സമയങ്ങളിൽ ഭാര വാഹനങ്ങളും ചെറിയ മറ്റ് വാഹനങ്ങളും ഒരുപോലെ നിരത്തിലിറങ്ങുമ്പോഴുള്ള ​ഗതാ​ഗതക്കുരുക്കും അപകടങ്ങളും കുറയ്ക്കുകയാണ് ലക്ഷ്യമെന്ന് അധികൃതർ അറിയിച്ചു.