രഞ്ജി ട്രോഫി: സെമി ഫൈനലില്‍ കേരളം ഇന്ന് ഗുജറാത്തിനെ നേരിടും

അഹമ്മദാബാദ്: രഞ്ജി ട്രോഫി ക്രിക്കറ്റില്‍ ഫൈനല്‍ ലക്ഷ്യമിട്ടുള്ള കേരളത്തിന്റെ പോരാട്ടത്തിന് ഇന്ന് തുടക്കം. സെമി ഫൈനലില്‍ ഗുജറാത്താണ് കേരളത്തിന്റെ എതിരാളികള്‍. അഹമ്മദാബാദ് – മൊട്ടേറ – നരേന്ദ്ര മോദി സ്റ്റേഡിയത്തില്‍ വച്ച് രാവിലെ ഒന്‍പതരയ്ക്കാണ് മത്സരം ആരംഭിക്കുക. രഞ്ജി ട്രോഫി ചരിത്രത്തിലെ ആദ്യ ഫൈനല്‍ എന്ന ലക്ഷ്യവുമായാണ് സച്ചിന്‍ ബേബിയും സംഘവും ഇറങ്ങുന്നത്.

ഗ്രൂപ്പ് ഘട്ടത്തില്‍ കര്‍ണ്ണാടക, മധ്യപ്രദേശ്, ഉത്തര്‍പ്രദേശ്, ബംഗാള്‍, തുടങ്ങിയ കരുത്തരായ എതിരാളികളെ മറികടന്ന കേരളം ക്വാര്‍ട്ടര്‍ ഫൈനലില്‍ ജമ്മു കശ്മീരിനെ വീഴ്ത്തിയത് ഒന്നാം ഇന്നിംഗ്‌സിലെ ഒറ്റ റണ്‍ ലീഡിന്റെ കരുത്തിലായിരുന്നു. 2017 ന് ശേഷം ആദ്യ ഫൈനല്‍ ലക്ഷ്യമിടുന്ന ഗുജറാത്ത് ക്വാര്‍ട്ടറില്‍ ഇന്നിംഗ്‌സിനും 98 റണ്‍സിനും സൗരാഷ്ട്രയെ തകര്‍ത്താണ് എത്തുന്നത്.

അവസാന രണ്ട് മത്സരത്തിലും സെഞ്ച്വറി നേടിയ സല്‍മാന്‍ നിസാറിനൊപ്പം മുഹമ്മദ് അസ്ഹറുദ്ദീന്‍, എം ഡി നിധീഷ്, അക്ഷയ് ചന്ദ്രന്‍, ജലജ് സക്‌സേന എന്നിവരും ഫോമിലുള്ളതാണ് കേരളത്തിന്റെ പ്രതീക്ഷ. ഫൈനലിലേക്കുള്ള വഴി എളുപ്പമാക്കാന്‍ രോഹന്‍ കുന്നുമ്മലും ഷോണ്‍ റോജറും നായകന്‍ സച്ചിന്‍ ബേബിയും പ്രതീക്ഷയ്‌ക്കൊത്ത് ബാറ്റുവീശണം. ജമ്മുകശ്മീരിനെതിരെ നേടിയ ജയത്തോളം പോന്ന നാടകീയ സമനില കേരള താരങ്ങളുടെ ആത്മവിശ്വാസം ഇരട്ടിയാക്കുമെന്ന് ഉറപ്പാണ്. ഇന്ത്യന്‍ സ്പിന്നര്‍ രവി ബിഷ്‌ണോയ് ആയിരിക്കും ഗുജറാത്ത് നിരയില്‍ കേരളത്തിന് കൂടുതല്‍ വെല്ലുവിളി ഉയര്‍ത്തുക. പ്രിയങ്ക് പാഞ്ചല്‍, ജയ്മീത് പട്ടേല്‍, ഉര്‍വില്‍ പട്ടേല്‍, ക്യാപ്റ്റന്‍ ചിന്തന്‍ ഗാജ എന്നിവരേയും കരുതിയിരിക്കണം.