റെയിൽവേ സ്റ്റേഷന് സമീപം പാർക്ക് ചെയ്ത വാഹനം കാണാതായ സംഭവം; ചങ്ങനാശേരിയിലെ ബൈക്ക് മോഷ്ടാവ് പിടിയിൽ

ചങ്ങനാശ്ശേരി: ചങ്ങനാശേരി റെയിൽവേ സ്റ്റേഷനടുത്തുനിന്ന് ബൈക്ക് മോഷ്ടിച്ച യുവാവ് അറസ്റ്റിൽ. പത്തനംതിട്ട കടപ്ര നിരണം ഭാഗത്ത് മഠത്തിൽ വീട്ടിൽ 35 കാരനായ സാജൻ തോമസാണ് പിടിയിലായത്. ചങ്ങനാശ്ശേരി പൊലീസ് ശാസ്ത്രീയ പരിശോധനയിലൂടെയാണ് മോഷ്ടാവിനെ അറസ്റ്റ് ചെയ്തത്. കഴിഞ്ഞദിവസം ചങ്ങനാശ്ശേരി റെയിൽവേ സ്റ്റേഷൻ പരിസരത്ത് പാർക്ക് ചെയ്തിരുന്ന ബൈക്ക് മോഷ്ടിച്ച് കടന്നുകളയുകയായിരുന്നു.

പരാതിയെ തുടർന്ന് ചങ്ങനാശ്ശേരി പൊലീസ് കേസ് രജിസ്റ്റർ ചെയ്യുകയും തുടർന്ന് നടത്തിയ ശാസ്ത്രീയമായ പരിശോധനയിലൂടെ മോഷ്ടാവിനെ തിരിച്ചറിയുകയും പിടികൂടുകയുമായിരുന്നു. മോഷണ മുതൽ കണ്ടെടുക്കുകയും ചെയ്തു. ചങ്ങനാശ്ശേരി സ്റ്റേഷൻ എസ്.ഐ സന്തോഷ്, ബിജു സി.എസ്, സി.പി.ഒമാരായ തോമസ് സ്റ്റാൻലി, നിയാസ്, ബ്ലസൻ ജോസഫ്, അരുൺ സൂര്യകാന്ത് എന്നിവർ ചേർന്നാണ് പ്രതിയെ അറസ്റ്റ് ചെയ്തത്. സാജൻ തോമസ് മാന്നാർ, പള്ളിക്കത്തോട്, നാട്ടുക്കൽ എന്നീ സ്റ്റേഷനുകളിലെ മോഷണ കേസുകളിൽ പ്രതിയാണ്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.