യുവാവിനെ തട്ടിക്കൊണ്ടുപോയി മർദ്ദിച്ച കേസിൽ ഒരാൾകൂടി പിടിയിൽ

ചട്ടഞ്ചാൽ: സാമ്പത്തിക ഇടപാട് പ്രശ്‌നത്തിൽ ചട്ടഞ്ചാലിൽനിന്ന് യുവാവിനെ പട്ടാപ്പകൽ കാറിൽ തട്ടിക്കൊണ്ടുപോയി മർദ്ദിച്ച് താമരശ്ശേരിയിൽ ഇറക്കിവിട്ട സംഭവത്തിൽ ഒരാൾകൂടി അറസ്റ്റിൽ. മുട്ടത്തൊടി ആലംപാടി അക്കരപള്ളത്തെ അമീറലി(26)യാണ് പിടിയിലായത്.ചട്ടഞ്ചാൽ കുന്നാറയിലെ കെ. അർഷാദി(26)നെയാണ് വെള്ളിയാഴ്‌ച ഉച്ചയ്ക്ക് തട്ടിക്കൊണ്ടുപോയത്. ഫസൽ ഫഹദിൻ്റെ പരാതിയിൽ മേൽപ്പറമ്പ് പോലീസ് കേസെടുത്ത് അന്വേഷണം നടത്തവേ ശനിയാഴ്ച വൈകിട്ട് താമരശേരിയിൽ അർഷാദിനെ ഇറക്കിവിടുകയായിരുന്നു. നാലാംമൈൽ സിറ്റിസൺ നഗർ സ്വദേശിയാണ് കേസിലെ ഒന്നാംപ്രതി. ഇയാളും സംഘത്തിലെ മറ്റ് അഞ്ചുപേരും ഒളിവിലാണ്. ഹൊസ്‌ദുർഗ് കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു. കുന്നാറയിലെ ജിലാനി സൂപ്പർ മാർക്കറ്റിന് സമീപമുള്ള ഹോട്ടലിന് മുന്നിൽ സുഹൃത്ത് ഫസൽ ഫഹദുമായി സംസാരിച്ച് നിൽക്കവെയാണ് കാറിലെത്തിയ സംഘം അർഷാദിനെ ബലം പ്രയോഗിച്ച് കാറിൽ കയറ്റി സ്ഥലംവിട്ടത്.