ശബരിമലയിലെത്തുന്ന എല്ലാ ഭക്തർക്കും സുഗമമായ ദർശനം ഉറപ്പാക്കുമെന്ന് ദേവസ്വം വകുപ്പ് മന്ത്രി വിഎൻ വാസവൻ.

പത്തനംതിട്ട:വരുന്ന മണ്ഡല – മകരവിളക്ക് സീസണിൽ ശബരിമലയിൽ സ്പോട്ട് ബുക്കിങ് ഒഴിവാക്കിയ സർക്കാർ തീരുമാനത്തിനെതിരെ പ്രതിപക്ഷ കക്ഷികളടക്കം രംഗത്തെത്തിയതിനിടെയാണ് മന്ത്രിയുടെ പ്രതികരണം.തീർഥാടകരുടെ പ്രതിദിന എണ്ണം 80,000ന് മുകളിൽ പോകാതെ ക്രമീകരിക്കേണ്ടത് തീർഥാടകരുടെ സൗകര്യങ്ങൾ ഉറപ്പാക്കുന്നതിന് അനിവാര്യമാണ്. സ്പോട്ട് ബുക്കിങ്ങിന് പകരം ക്രമീകരണം ഏർപ്പെടുത്തും. വിവിധ ഇടത്താവളങ്ങളിൽ അക്ഷയ കേന്ദ്രങ്ങൾ ഒരുക്കും. ഭക്തരുടെ താൽപര്യങ്ങൾ സംരക്ഷിക്കും. ശബരിമലയുടെ പേരിൽ രാഷ്ട്രീയ മുതലെടുപ്പ് നടത്തി കലാപമുണ്ടാക്കാൻ ആരെയും അനുവദിക്കില്ല. ഭക്തജനങ്ങളുടെ സുരക്ഷ മാത്രമാണ് സർക്കാർ ലക്ഷ്യമെന്നും മന്ത്രി വ്യക്തമാക്കി.അതേസമയം സ്പോട്ട് ബുക്കിങ് ഒഴിവാക്കിയ സർക്കാർ തീരുമാനം പിൻവലിക്കണമെന്ന നിലപാടിൽ ഉറച്ചുനിൽക്കുകയാണ് കോൺഗ്രസും ബിജെപിയും. സമരവേദിയായി ശബരിമലയെ മാറ്റുന്നത് ശരിയല്ലെന്നും സ്പോട്ട് ബുക്കിങ്ങിലൂടെ ദർശനം നടത്താനുള്ള അനുവാദം ഉണ്ടാകണമെന്നും കോൺഗ്രസ് നേതാവ് രമേശ് ചെന്നിത്തല പറഞ്ഞു. സ്പോട്ട് ബുക്കിങ് സർക്കാർ അനുവദിച്ചില്ലെങ്കിൽ ഓൺലൈൻ ബുക്കിങ്ങില്ലാതെ ശബരിമലയിൽ ദർശനം നടത്താൻ ബിജെപി ഭക്തജനങ്ങളെ സഹായിക്കുമെന്നാണ് പാർട്ടി സംസ്ഥാന അധ്യക്ഷൻ കെ സുരേന്ദ്രൻ്റെ നിലപാട്. അതിനിടെ, വെർച്വൽ ക്യൂവിനൊപ്പം ശബരിമലയിൽ സ്പോട്ട് ബുക്കിങ് വേണമെന്ന് സിപിഐയും ആവശ്യപ്പെട്ടു.ശബരിമലയെ സർക്കാർ സമരവേദിയാക്കുന്നുവെന്ന് ഹിന്ദു ഐക്യവേദി പ്രതികരിച്ചിരുന്നു. വിഷയത്തിൽ സർക്കാരും ദേവസ്വം ബോർഡും അനാസ്ഥ കാട്ടുന്നുവെന്ന് ആരോപിച്ച് ഹൈന്ദവ സംഘടനകൾ ഈ മാസം 26ന് പന്തളത്ത് സംയുക്ത യോഗം ചേരും. പന്തളം കൊട്ടാരത്തിന്റെ നേതൃത്വത്തിൽ വിവിധ അയ്യപ്പഭക്ത സംഘടനകളുടെ ഭാരവാഹികൾ നടത്തിയ യോഗത്തിലാണ് തീരുമാനം. ഒക്ടോബർ 16ന് തിരുവാഭരണ മാളികയിൽ നാമജപ പ്രാർഥന നടത്താനും യോഗത്തിൽ തീരുമാനിച്ചു. മുഖ്യമന്ത്രി പിണറായി വിജയന്റെ അധ്യക്ഷതയിൽ ചേർന്ന ശബരിമല മണ്ഡല – മകരവിളക്ക് മഹോത്സവ മുന്നൊരുക്കങ്ങളുടെ അവലോകന യോഗത്തിലാണ് ദർശനത്തിനുള്ള സ്പോട്ട് ബുക്കിങ് ഒഴിവാക്കാനും ഓൺലൈൻ ബുക്കിങ് മാത്രമാക്കാനും തീരുമാനിച്ചത്. ശബരിമലയിൽ വരുന്ന ഒരു തീർഥാടകനും തിരിച്ചു പോകേണ്ടി വരില്ല. ഭക്തരുടെ സുഗമമായ ദർശനത്തിന് സർക്കാർ ആവശ്യമായ നടപടികൾ സ്വീകരിക്കുമെന്നും മന്ത്രി അറിയിച്ചു.