വിമാനക്കൂലി വർധനവുമായി ബന്ധപ്പെട്ട് വ്യോമയാനമന്ത്രിക്ക്‌ ബിനോയ് വിശ്വം കത്തയച്ചു

തിരുവനന്തപുരം : ജിസിസി രാജ്യങ്ങളിൽനിന്ന് കേരളത്തിലേക്ക് ഓണക്കാലത്ത് വിമാനക്കൂലി വർദ്ധിക്കുന്നത് നിയന്ത്രിക്കണമെന്ന് ആവശ്യപ്പെട്ട്‌ വ്യോമയാന മന്ത്രി റാം മോഹൻ നായിഡുവിന്സിപിഐ സംസ്ഥാന സെക്രട്ടറി ബിനോയ് വിശ്വം കത്തയച്ചു.

കേരളത്തിലെ ജനങ്ങളുടെ ഏറ്റവും പ്രധാന ആഘോഷമാണ് ഓണം. പ്രവാസികൾക്ക് കുടുംബത്തോടും ബന്ധുക്കളോടും സുഹൃത്തുക്കളോടും ഒപ്പം ഒത്തുചേരാനുള്ള അവസരമാണത്‌. എല്ലാ ഓണക്കാലത്തും എയർലൈൻ കമ്പനികൾ ടിക്കറ്റ് നിരക്ക് വർധിപ്പിക്കും.

കേരള നഗരങ്ങളിലേക്കുള്ള വിമാന ടിക്കറ്റ്‌ നിരക്ക്‌ ഇത്തവണയും കുത്തനെ ഉയരുകയാണ്. അമിതമായ ടിക്കറ്റ് നിരക്ക് കാരണം പലരും യാത്ര റദ്ദാക്കാൻ നിർബന്ധിതരാകുന്നു. വിലക്കയറ്റം സൃഷ്ടിക്കുന്ന മാനസികവും സാമ്പത്തികവുമായ ബുദ്ധിമുട്ടുകൾ ആഘോഷത്തിന്റെ ചാരുത കെടുത്തുകയാണ്. ഈ വിഷയത്തിൽ സിവിൽ ഏവിയേഷൻ മന്ത്രി എന്ന നിലയിൽ ഇടപെടണമെന്നും വിമാനക്കമ്പനികളുടെ കൊള്ള അവസാനിപ്പിക്കാൻ ഇടപെടണമെന്നും കത്തിൽ അദ്ദേഹം ആവശ്യപ്പെട്ടു.