തുറമുഖം വഴി രാജ്യത്തേക്ക് മയക്ക്​മരുന്ന്​ കടത്താൻ ശ്രമം; ഉരുളക്കിഴങിനുള്ളിൽ ഒളിപ്പിച്ച്​ കടത്താൻ ശ്രമിച്ചത് 27 കിലോ കൊക്കെയ്ൻ

റിയാദ്: ജിദ്ദ ഇസ്​ലാമിക്​ പോർട്ടിൽ ഉരുളക്കിഴങിനുള്ളിൽ ഒളിപ്പിച്ച്​ കടത്താൻ ശ്രമിച്ച 27 കിലോ കൊക്കെയ്ൻ പിടികൂടി. ജിദ്ദ ഇസ്ലാമിക് പോർട്ടിലെ സകാത്ത്, ടാക്സ് ആൻഡ് കസ്റ്റംസ് അതോറിറ്റിയാണ്​ ഇത്രയും മയക്ക്​മരുന്ന്​ രാജ്യത്തേക്ക്​ കടത്താനുള്ള ശ്രമം പരാജയപ്പെടുത്തിയത്​

തുറമുഖം വഴി രാജ്യത്തേക്ക് കൊണ്ടുവന്ന ഉരുളക്കിഴങ്ങ് ചരക്ക് കണ്ടെയ്‌നറിൽ ഒളിപ്പിച്ച നിലയിലാണ് കൊക്കെയ്​ൻ കണ്ടെത്തിയത്​. നാർക്കോട്ടിക് കൺട്രോൾ ഡിപ്പാർട്ട്‌മെൻറി​ന്‍റെ സഹകരണത്തിൽ പിടികൂടിയ സാധനങ്ങളുടെ സൗദിയിലെ സ്വീകർത്താക്കളായ രണ്ട്​പേരെ അറസ്റ്റ് ചെയ്തതായി അതോറിറ്റി വ്യക്തമാക്കി.

കണ്ടെയ്‌നറുകളിലൊന്നിൽ പരിശോധന നടത്തിയപ്പോൾ കണ്ടെയ്‌നറി​ന്‍റെ എയർ കണ്ടീഷനിങ്​ ഉപകരണത്തിനുള്ളിൽ ഒളിപ്പിച്ച നിലയിൽ ഇത്രയും കൊക്കെയ്ൻ കണ്ടെത്തിയതെന്നും അതോറിറ്റി വിശദീകരിച്ചു. രാജ്യത്തെ ഇറക്കുമതിയിലും കയറ്റുമതിയിലും കസ്റ്റംസ് നിയന്ത്രണം കർശനമാക്കുന്നത് തുടരുകയാണെന്നും കള്ളക്കടത്തുകാരുടെ ശ്രമങ്ങൾ നിരീക്ഷണത്തിലാണെന്നും സകാത്ത്, ടാക്സ്, കസ്റ്റംസ് അതോറിറ്റി പറഞ്ഞു.