വീട് കുത്തി തുറന്ന് സ്വര്‍ണമാലയും വീട്ടുപകരണങ്ങളും മോഷ്ടിച്ചു; അന്വേഷണം ആരംഭിച്ച് പൊലീസ്

തിരുവനന്തപുരം: വീട് കുത്തി തുറന്ന് സ്വര്‍ണമാലയും വീട്ടുപകരണങ്ങളും മോഷ്ടിക്കപ്പെട്ട നിലയിൽ. ഇന്നലെ രാത്രി ബാലരാമപുരം ആര്‍സി സ്ട്രീറ്റില്‍ ബെന്നി സേവ്യറുടെ വീട്ടിലാണ് മോഷണം നടന്നത്. സ്വര്‍ണമാലയും റ്റി.വി ഉള്‍പ്പെടെ നിരവധി വീട്ടുപകരണങ്ങളും നഷ്ട്ടപ്പെട്ടു. വീട്ടുടമ വിദേശത്തായതിനാൽ ഒരുമാസത്തിലെറെയായി വീട് ആള്‍ താമസമില്ലാതെ അടച്ചിട്ടിരിക്കുകയായിരുന്നു.

ബെന്നിയുടെ ബന്ധു സമീപത്ത് താമസിക്കുന്ന വീട്ടുകാര്‍ എല്ലാദിവസവും ഈ വീട്ടിലെത്തി ലൈറ്റിട്ടു പോകുക പതിവായിരുന്നു. ഇന്ന് വീട്ടിലെത്തുമ്പോഴാണ് മോഷണം നടന്നതായി ശ്രദ്ധയില്‍പ്പെട്ടത്. ബാലരാമപുരം പൊലീസ് അന്വേഷണം ആരംഭിച്ചിട്ടുണ്ട്. ഒന്നിലെറെ മോഷ്ടാക്കളുടെ സാന്നിദ്ധ്യത്തിലാണ് മോഷണം നടന്നിട്ടുള്ളതെന്നും പ്രാഥമിക നിഗമനം.