യുവതിയെ ലൈംഗിക പീഡനത്തിനിരയാക്കി ദൃശ്യങ്ങൾ പകർത്തി; യുവാവ് കസ്റ്റ‍ഡിയിൽ

അടിമാലി: യുവതിയെ ലൈംഗിക പീഡനത്തിനിരയാക്കി നഗ്‌നദൃശ്യങ്ങൾ പകർത്തിയ കേസിൽ യുവാവ് കസ്റ്റ‍ഡിയിൽ. കട്ടപ്പന തൊപ്പിപ്പാള സ്വദേശി ബിബിനെയാണ് അടിമാലി പൊലീസ് കസ്റ്റ‍ഡിയിലെടുത്തത്. ഇയാൾ പീഡനദൃശ്യങ്ങൾ പകർത്തി ബന്ധുക്കൾക്ക് അയച്ചുവെന്നാണ് പരാതി. ബിബിൻ ഭീഷണിപ്പെടുത്തിയതിനെ തുടർന്നാണ് യുവതി പൊലീസിൽ പരാതി നൽകിയത്.

ബന്ധുവിന്റെ വിവാഹത്തിനെത്തിയ സമയത്താണ് യുവതിയും പ്രതിയും തമ്മിൽ സൗഹൃദത്തിലായത്. പിന്നീട് മൊബൈൽ ഫോണിലൂടെ ബന്ധം തുടരുകയായിരുന്നു. ഇതിനു പിന്നാലെയാണ് അടിമാലിയിലെ സ്വകാര്യ ലോഡ്ജിലെത്തിച്ച് യുവതിയെ പീഡനത്തിന് ഇരയാക്കി ദൃശ്യങ്ങൾ പകർത്തിയത്. പിന്നീട് പലപ്പോഴും ഇയാൾ യുവതിയെ ലൈംഗികമായി പീഡിപ്പിക്കാൻ ശ്രമിച്ചെങ്കിലും യുവതി വഴങ്ങിയില്ല.

ഇതോടെയാണ് കൈവശമുണ്ടായിരുന്ന പീഡനദൃശ്യങ്ങൾ യുവതിയുടെ ബന്ധുക്കൾക്ക് അയച്ചുകൊടുക്കുമെന്ന് ഭീഷണിപ്പെടുത്തിയത്. ഭീഷണിക്കു വഴങ്ങാതിരുന്ന യുവതി, ഇക്കാര്യം ബന്ധുക്കളെ അറിയിക്കുകയും അവരുടെ ഇടപെടലിനെ തുടർന്നാണ് യുവതി പൊലീസിൽ പരാതി നൽകിയത്. അടിമാലി പൊലീസ് പ്രതിയെ സ്റ്റേഷനിൽ എത്തിച്ച് ചോദ്യം ചെയ്തു.