ഹോളി പൂജ: മഹാകാളീശ്വർ ക്ഷേത്രത്തിൽ ഭസ്മ ആരതിയ്ക്കിടെ തീപിടിത്തം; 13 പുരോഹിതർക്ക് പരിക്ക്

ഭോപാൽ: മധ്യപ്രദേശിലെ ഉജ്ജയിനിൽ മഹാകാളീശ്വർ ക്ഷേത്രത്തിലുണ്ടായ തീപിടിത്തത്തിൽ 13 പുരോഹിതർക്ക് പരുക്ക്. ഹോളി ദിനത്തിൽ ക്ഷേത്രത്തിന്റെ ശ്രീകോവിലിനുള്ളിൽ ഭസ്മ ആരതി നടക്കുന്നതിനിടെയാണ് തീപിടുത്തമുണ്ടായത്. പരുക്കേറ്റവരെ ജില്ലാ ആശുപത്രിയിൽ പ്രവേശിപ്പിച്ചു. മുഖ്യ പുരോഹിതൻ സഞ്ജയ് ഗുരുവിന് അടക്കം പൊള്ളലേറ്റിട്ടുണ്ട്. ആരുടെയും നില ഗുരുതരമല്ലെന്നാണ് വിവരം.

അപ്രതീക്ഷിത അപകടമാണ് ക്ഷേത്രത്തിനുള്ളിൽ സംഭവിച്ചതെന്ന് ജില്ലാ കലക്ടർ നീരജ് സിങ് പറഞ്ഞു. പരുക്കേറ്റവർക്ക് മതിയായ ചികിത്സ നൽകുമെന്നും അദ്ദേഹം പറഞ്ഞു. സംഭവത്തിൽ മജിസ്ടീരിയിൽ അന്വേഷണം നടക്കും.

മുഖ്യമന്ത്രി മോഹൻ യാദവുമായി ഫോണിൽ സംസാരിച്ചെന്നും പരുക്കേറ്റവർക്ക് പ്രാദേശിക ഭരണകൂടം മതിയായ ചികിത്സ നൽകുമെന്നും കേന്ദ്ര ആഭ്യന്തരമന്ത്രി അമിത് ഷാ അറിയിച്ചു.