മാലിന്യമുക്തം നവകേരളം: കലാജാഥ പെരുവന്താനത്ത് സമാപിച്ചു

മാലിന്യമുക്തം നവകേരളം കാമ്പയ്‌ന്റെ ഭാഗമായി ഫെബ്രുവരി 12ന് ആരംഭിച്ച കലാജാഥ പെരുവന്താനത്ത് സമാപിച്ചു. പെരുവന്താനം ഗ്രാമപഞ്ചായത്ത് ഹാളില്‍ നടന്ന സമാപന സമ്മേളനം ജില്ലാ പഞ്ചായത്ത് വൈസ് പ്രസിഡന്റ് ആശ ആന്റണി ഉദ്ഘാടനം ചെയ്തു. തദ്ദേശസ്വയംഭരണ വകുപ്പ് ജോയിന്ററ് ഡയറക്ടര്‍ കെ.വി കുര്യാക്കോസ് അധ്യക്ഷത വഹിച്ചു.

മാലിന്യമുക്തം നവകേരളം ജില്ലാ കാമ്പയ്ന്‍ സെക്രട്ടറിയേറ്റിന്റെ നേതൃത്വത്തില്‍ കുടുംബശ്രീ ജില്ലാ മിഷനും ജില്ലാ ശുചിത്വ മിഷനും സംയുക്തമായാണ് ജില്ലയിലുടനീളം കലാജാഥ സംഘടിപ്പിച്ചത്. ജില്ലയിലെ 77 വേദികളില്‍ കലാജാഥ പര്യടനം നടത്തി. കലാജാഥ എത്തിയ ഓരോ വേദിയിലും പൊതുജനങ്ങള്‍, ഹരിതകര്‍മ്മസേന അംഗങ്ങള്‍, പഞ്ചായത്ത് ഭരണസമിതി അംഗങ്ങള്‍, ഉദ്യോഗസ്ഥര്‍, ശുചിത്വ മിഷന്‍ ജീവനക്കാര്‍, കുടുംബശ്രീ ജില്ലാ മിഷന്‍ സ്‌നേഹിത ജീവനക്കാര്‍, കമ്മ്യൂണിറ്റി കൗണ്‍സിലേഴ്‌സ്, കുടുംബശ്രീ എഡിഎസ്, സിഡിഎസ് അംഗങ്ങള്‍ തുടങ്ങി 250 ല്‍ അധികം പേര്‍ പങ്കെടുത്തു.