വികസിത് ഭാരത് സങ്കൽപ് യാത്ര തൃശ്ശൂർ ജില്ലയിൽ പര്യടനം തുടരുന്നു

തൃശ്ശൂർ : 26 ഡിസംബർ 2023

തൃശൂർ ജില്ലയിൽ പര്യടനം പുരോഗമിക്കുന്ന വികസിത് ഭാരത് സങ്കൽപ് യാത്ര  മുപ്പത്തിനാല്  കേന്ദ്രങ്ങൾ പിന്നിട്ട് ഒല്ലൂക്കര ബ്ലോക്കിൽ എത്തിച്ചേർന്നു. ഒല്ലുക്കര ബ്ലോക്കിലെ മാടക്കത്തറ ഗ്രാമപഞ്ചായത്തിൽ എത്തിയ സങ്കൽപ് യാത്രയ്ക്ക് സ്വീകരണം നൽകി.

പാണ്ടിപ്പറമ്പ് സുബ്രഹ്മണ്യ സ്വാമി ക്ഷേത്ര മൈതാനത്ത് നടന്ന പരിപാടിയുടെ ഉദ്ഘാടനം മാടക്കത്തറ ഗ്രാമ പഞ്ചായത്ത് അഞ്ചാം വാർഡ് മെമ്പർ വിനീഷ് ഇ.വി നിർവഹിച്ചു. മാടക്കത്തറ പഞ്ചായത്തിലെ മികച്ച കർഷക ഷീല, സംസ്ഥാനതല സെപക് തക്റാ  ഗോൾഡ്മെഡൽ വിജയി വൈഗ, സംസ്ഥാനതല ഫെൻസിംഗ് വിജയി ആദർശ് എന്നിവരെ ചടങ്ങിൽ ആദരിച്ചു. വിവിധ കേന്ദ്ര പദ്ധതികളിൽ അംഗമായി വിജയകരമായ സംരംഭങ്ങൾ നടത്തുന്ന ഗുണഭോക്താക്കളെയും ചടങ്ങിൽ ആദരിച്ചു. ഗുണഭോക്താക്കൾ തങ്ങളുടെ അനുഭവങ്ങൾ പങ്കുവെച്ചു.

പരിപാടിയുടെ ഭാഗമായി വിവിധ വിഭാഗത്തിൽപ്പെട്ട അപേക്ഷകർക്ക് അനുവദിക്കപ്പെട്ട ബാങ്ക് വായ്പകളുടെ വിതരണം,  കേന്ദ്ര ഗവൺമെന്റിന്റെ വിവിധ സാമൂഹിക സുരക്ഷാ പദ്ധതികളിൽ പേര് ചേർക്കുന്നതിനുള്ള സൗകര്യം എന്നിവ ഒരുക്കിയിരുന്നു.  വിവിധ കലാപരിപാടികളും സംഘടിപ്പിച്ചിരുന്നു.

ജില്ലാ ലീഡ് ബാങ്ക് മാനേജർ മോഹനചന്ദ്രൻ അധ്യക്ഷത വഹിച്ച യോഗത്തിൽ, തൃശൂർ ഗ്രാമീണ സ്വയം തൊഴിൽ പരിശീലന കേന്ദ്രം ഡയറക്ടർ കൃഷ്ണമോഹൻ, കാനറ ബാങ്ക് മണ്ണുത്തി ബ്രാഞ്ച് ചീഫ് മാനേജർ അനൂബ് സി.എം എന്നിവർ സംസാരിച്ചു.