‘എയർപോർട്ട് ഷോ’യ്ക്ക് ദുബായ് ആതിഥേയത്വം വഹിക്കും

വിമാനത്താവള വ്യവസായവുമായി ബന്ധപ്പെട്ട ലോകത്തെ ഏറ്റവുംവലിയ പ്രദർശനമായ ‘എയർപോർട്ട് ഷോ’യ്ക്ക് മേയിൽ ദുബായ് ആതിഥേയത്വം വഹിക്കും.ലോകമെമ്പാടുമുള്ള എയർപോർട്ട് ഡിവലപ്പർമാർ, ഉദ്യോഗസ്ഥർ, വിതരണക്കാർ എന്നിവർ ദുബായ് വേൾഡ് ട്രേഡ് സെന്ററിലെ ത്രിദിന പ്രദർശനത്തിന്റെ 23-ാം പതിപ്പിൽ പങ്കെടുക്കും.20-ലേറെ രാജ്യങ്ങളിൽനിന്നുള്ള 150-ലേറെ പ്രദർശകരും 30-ലേറെ രാജ്യങ്ങളിൽനിന്നായി 7500-ലേറെ സന്ദർശകരും പ്രദർശനത്തിലെത്തും.

വിമാനത്താവളങ്ങളുടെ പ്രവർത്തനമികവ് ഉയർത്താൻ ഉതകുന്ന അത്യാധുനിക സാങ്കേതികവിദ്യകളും നൂതന ഉത്പന്നങ്ങളും പ്രദർശനത്തിലുണ്ടാകുമെന്ന് ദുബായ് സിവിൽ ഏവിയേഷൻ അതോറിറ്റി പ്രസിഡന്റും ദുബായ് വിമാനത്താവളങ്ങളുടെ ചെയർമാനും എമിറേറ്റ്സ് എയർലൈൻ ആൻഡ് ഗ്രൂപ്പിന്റെ ചെയർമാനും ചീഫ് എക്സിക്യുട്ടീവും എയർപോർട്ട് ഷോയുടെ രക്ഷാധികാരിയുമായ ശൈഖ് അഹമ്മദ് ബിൻ സഈദ് അൽ മക്തൂം പറഞ്ഞു.