ഹൊസൂരിന് സമീപം കാട്ടാന ആക്രമണത്തിൽ രണ്ടുസ്ത്രീകൾ മരിച്ചു

 കൃഷ്ണഗിരി ജില്ലയിൽ ഹൊസൂരിനുസമീപം രണ്ടിടത്തായി കാട്ടാനയുടെ ആക്രമണത്തിൽ രണ്ടുസ്ത്രീകൾ മരിച്ചു. ശനിയാഴ്ച വൈകീട്ടോടെയാണ് സംഭവം.കൃഷ്ണഗിരിയിലെ തേൻകണിക്കോട്ടൈ അണ്ണിയാളം ഗ്രാമത്തിലെ അനന്തന്റെ ഭാര്യ വസന്തമ്മാൾ(33), താച്ചപ്പള്ളി ഗ്രാമത്തിലെ വെങ്കിടേഷിന്റെ ഭാര്യ അശ്വന്തമ്മ (45) എന്നിവരാണ് മരിച്ചത്.

ജോലികഴിഞ്ഞ് വീട്ടിലേക്കുപോകുമ്പോഴാണ് ഇരുവരെയും കാട്ടാന ആക്രമിച്ചത്. കർണാടക വനാതിർത്തിയിൽനിന്ന് ഹൊഗനക്കൽ വഴി കൃഷ്ണഗിരിയിലെ ഗ്രാമത്തിലെത്തിയ ആനയാണ് സ്ത്രീകളെ കൊന്നതെന്ന് വനംവകുപ്പ് അധികൃതർ പറഞ്ഞു. സംഭവത്തിൽ പ്രതിഷേധിച്ച് പ്രദേശവാസികൾ ഹൊസൂരിനുസമീപം ദേശീയപാത ഉപരോധിച്ചു.