ബേപ്പൂര്‍ ഇന്റർനാഷണൽ വാട്ടർ ഫെസ്റ്റ്: ആഘോഷ ദിനങ്ങൾ വിളിച്ചറിയിച്ച് ഫ്ലാഷ് മോബ്

കോഴിക്കോട്: സാഹസിക പ്രേമികളും സഞ്ചാരികളും ആവേശത്തോടെ കാത്തിരിക്കുന്ന ബേപ്പൂർ ഇന്റർനാഷണൽ വാട്ടര്‍ ഫെസ്റ്റിന്റെ പ്രചാരണാർഥം ജില്ലയിലെ വിവിധ ഭാഗങ്ങളിൽ ഫ്ലാഷ് മോബ് അരങ്ങേറി.

ഡിസംബർ 26 മുതൽ 29 വരെ നടക്കുന്ന മൂന്നാമത് ബേപ്പൂര്‍ ഇന്റർനാഷണൽ വാട്ടർ ഫെസ്റ്റിൽ എത്തുന്നവരിലേക്ക്  മാലിന്യമുക്ത സന്ദേശം എത്തിക്കുന്നതിനായാണ് ‘മാലിന്യ മുക്ത ബേപ്പൂർ, മാലിന്യ മുക്തനാളേക്കായ് യുവത’ എന്ന ഹാഷ് ടാഗോടെ ഫ്‌ളാഷ് മോബ് സംഘടിപ്പിച്ചത്.

പുതിയ ബസ് സ്റ്റാന്റ്, മിഠായിത്തെരു, സൗത്ത് ബീച്ച്, കൾച്ചറൽ ബീച്ച്, ഫറോക്ക് ബസ് സ്റ്റാന്റ്, ബേപ്പൂർ സ്റ്റാന്റ് എന്നിവിടങ്ങളിലാണ് ഫ്ലാഷ് മോബ് അവതരിപ്പിച്ചത്. ഫാറൂഖ് കോളേജ് എൻ എസ് എസ് യൂണിറ്റിലെ 20 അംഗ വിദ്യാർത്ഥി സംഘത്തിന്റെ നേതൃത്വത്തിലായിരുന്നു ഫ്ലാഷ് മോബ്.