പാർസലിൽ ഓർഡർ ചെയ്ത എല്ലാ സാധനങ്ങളുമില്ലെന്ന് പറഞ്ഞ് ഹോട്ടലുടമയെ വെട്ടി; നാലുപേർ പിടിയിൽ

തിരുവനന്തപുരം: പാർസലിൽ ഓർഡർ ചെയ്ത എല്ലാ സാധനങ്ങളുമില്ലെന്ന് പറഞ്ഞ് ഹോട്ടലുടമയെ വെട്ടിപ്പരിക്കേൽപ്പിച്ച ആറംഗ സംഘത്തിലെ നാലുപേർ പിടിയിൽ. ഒളിവിലായിരുന്ന വെട്ടൂർ സ്വദേശി റിക്കാസ് മോൻ, കോരാണി സ്വദേശി ഉണ്ണി എന്ന ബിജു, പാലച്ചിറ സ്വദേശി കിട്ടൂസ്, ശ്രീക്കുട്ടൻ എന്ന ശ്രീജിത്ത് എന്നിവരെയാണ്  വർക്കല പൊലീസ് പിടികൂടിയത്. രണ്ടുപേർ ഇപ്പോഴും ഒളിവിലാണ്.

ഡിസംബര്‍ 17ന് രാത്രിയായിരുന്നു സംഭവം നടന്നത്. വർക്കല ആർ.ടി.ഒ ഓഫിസിന് സമീപം പ്രവർത്തിക്കുന്ന സംസം ഹോട്ടൽ ഉടമ നൗഷാദിനാണ് (47) വെട്ടേറ്റത്. ഇവർ ഹോട്ടലിൽനിന്ന് ഭക്ഷണം പാർസൽ വാങ്ങിയിരുന്നു. ഓർഡർ ചെയ്ത എല്ലാ സാധനങ്ങളും പാർസലിൽ ഉൾപ്പെടുത്തിയില്ല എന്നാരോപിച്ച് ഹോട്ടലിൽ എത്തിയ സംഘം നൗഷാദുമായി വഴക്കിടുകയും  ഹോട്ടൽ അടക്കുന്ന സമയത്ത് വീണ്ടുമെത്തി അസഭ്യം വിളിക്കുകയും മർദിക്കുകയുമായിരുന്നു.