പഞ്ചായത്ത് വൈസ് പ്രസിഡന്റിനെ മർദിച്ച് കൊലപ്പെടുത്തി: മുഖ്യപ്രതി കാസർകോട് നിന്ന് അറസ്റ്റിൽ

തൊടിയൂർ പഞ്ചായത്ത് വൈസ് പ്രസിഡൻറ് സലിം മണ്ണേൽ കുടുംബവഴക്ക് പരിഹരിക്കാൻ ശ്രമിച്ചപ്പോൾ മർദനമേറ്റ് മരിച്ച കേസിലെ മുഖ്യപ്രതി കാസർകോട് നിന്ന് പിടിയിലായി. നൗഷാദ് അബ്ദുൾ റഹീം (42) കാസർകോട് ഒരു സുഹൃത്തിനൊപ്പം താമസിക്കുന്നതായി രഹസ്യവിവരം ലഭിച്ചതിനെ തുടർന്ന് പോലീസ് അറസ്റ്റ് ചെയ്തു. സുഹൃത്തിൽ നിന്ന് പണം കടം വാങ്ങിയ ശേഷം പള്ളി സന്ദർശിച്ച് മടങ്ങുമ്പോഴാണ് ഇയാൾ പിടിയിലായത്. കൊല്ലത്തുനിന്നുള്ള അന്വേഷണസംഘം കാസർകോട് പോലീസിന്റെ സഹായത്തോടെയാണ് ഇയാളെ പിടികൂടിയത്. നൗഷാദിന്റെ കുടുംബാംഗങ്ങളിൽ ചിലർ നേരത്തെ കാസർകോട് താമസിച്ചിരുന്നതായും അതിനാൽ ചില പ്രാദേശിക ബന്ധങ്ങളുണ്ടായിരുന്നതായും പോലീസിന് വിവരം ലഭിച്ചിരുന്നു.

വെള്ളിയാഴ്ചയാണ് കേസിന് ആസ്പദമായ സംഭവം. കുടുംബപ്രശ്നത്തെ ചൊല്ലി യുവാവും യുവതിയും തമ്മിൽ സംഘർഷമുണ്ടായി. ജമാഅത്ത് പ്രസിഡൻറ് കൂടിയായ സലിം മണ്ണേൽ മധ്യസ്ഥത വഹിക്കാൻ ശ്രമിക്കുന്നതിനിടെയാണ് മർദനമേറ്റത്. നൗഷാദിന്റെ അറസ്റ്റോടെ കേസിൽ അറസ്റ്റിലായവരുടെ എണ്ണം അഞ്ചായി. മുഹമ്മദ് ഷാ (27), യൂസഫ് (58) എന്നിവരെ സംഭവദിവസം കസ്റ്റഡിയിലെടുത്തിരുന്നു. ഫൈസൽ (35), സഹോദരൻ മുസ്സമ്മൽ (25) എന്നിവരെ പിന്നീട് പാലക്കാട്ടുനിന്ന് അറസ്റ്റ് ചെയ്തു. കണ്ടാലറിയാവുന്ന 15 പേർക്കെതിരെ കേസെടുത്തു