ചരിത്രം കുറിക്കാൻ തയാറെടുത്ത് ആമിർ; നട​ന്റെ തീരുമാനത്തിൽ ഭയന്ന് 125 കോടി രൂപ ഓഫർ ചെയ്ത് നെറ്റ്ഫ്ലിക്സ്

മുംബൈ: പുത്തന്‍ ചിന്തകൾക്കും അസാധാരണമായ മാർക്കറ്റിംഗ് തന്ത്രങ്ങള്‍ക്കും പേരുകേട്ട ആമിർ ഖാൻ പരമ്പരാ​ഗത സ്ട്രീമിം​ഗ് ഭീമൻമാരെ ഭയപ്പെടുത്തുന്ന പദ്ധതിയുമായി എത്തുന്നു. ഇതോടെ ആമിർ ഖാന്റെ വരാനിരിക്കുന്ന ചിത്രമായ സീതാരേ സമീൻ പര്‍ ഈ വർഷത്തെ ഏറ്റവും പ്രധാനപ്പെട്ട സ്ട്രീമിംഗ് ഡീലുകളിൽ ഒന്നായി മാറിയേക്കും എന്ന് സൂചന. ചിത്രത്തിന്‍റെ ഒടിടി അവകാശങ്ങൾ സ്വന്തമാക്കാൻ 125 കോടി രൂപ നെറ്റ്ഫ്ലിക്സ് ഓഫര്‍ ചെയ്തുവെന്നാണ് വിവരം.

സ്ട്രീമിംഗ് ഭീമന്മാര്‍ 50 മുതൽ 60 കോടി രൂപ വരെയാണ് ഈ ചിത്രത്തിന് ഓഫർ നൽകിയിരുന്നത്, ബോളിവുഡിലെ മിക്ക മുൻനിര ചിത്രങ്ങള്‍ക്കും ലഭിക്കുന്ന തുകയ്ക്ക് തുല്യമാണ് ഈ തുക. അതേ സമയം പടം തീയറ്റര്‍ റിലീസിനൊപ്പം യൂട്യൂബില്‍ പേ-പെർ-വ്യൂ മോഡലില്‍ റിലീസ് ചെയ്യും എന്ന് പറഞ്ഞതോടെയാണ് നെറ്റ്ഫ്ലിക്സ് ഓഫര്‍ ഇരട്ടിപ്പിച്ചത് എന്നാണ് ബോളിവുഡ് ഹംഗാമ പറയുന്നത്.

പുത്തന്‍ ചിന്തകളും അസാധാരണമായ മാർക്കറ്റിംഗ് തന്ത്രങ്ങള്‍ക്കും പേരുകേട്ട ആമിർ ഖാൻ, പരമ്പരാഗത സബ്‌സ്‌ക്രിപ്‌ഷൻ അധിഷ്ഠിത സ്ട്രീമിംഗ് പ്ലാറ്റ്‌ഫോമുകളോടുള്ള തന്റെ അതൃപ്തി നേരത്തെയും പരസ്യമായി പ്രകടിപ്പിച്ചിട്ടുണ്ട്. കഴിഞ്ഞ ഒരു വർഷമായി, പേ-പെർ-വ്യൂ മോഡൽ വഴി തന്റെ സിനിമകൾ യൂട്യൂബിൽ ലഭ്യമാക്കുന്നതിനെക്കുറിച്ച് സൂപ്പർസ്റ്റാർ വ്യാപകമായി സംസാരിച്ചിട്ടുണ്ട്.

അത്തരമൊരു പ്ലാറ്റ്‌ഫോം ഇന്ത്യൻ പ്രേക്ഷകർക്കിടയില്‍ പ്രത്യേകിച്ച് ടയർ-2, ടയർ-3 നഗരങ്ങളിൽ കൂടുതൽ സാന്നിധ്യം ഉറപ്പാക്കുന്നുവെന്ന് ആമിര്‍ വാദിച്ചിട്ടുണ്ട്. ആമിര്‍ പറയുന്നതനുസരിച്ച് ഈ മോഡൽ പ്രേക്ഷകർക്ക് നാമമാത്രമായ ഒറ്റത്തവണ ഫീസിനു പുതിയ സിനിമകൾ കാണാൻ പ്രാപ്തമാക്കും.

ചെലവേറിയ പ്രതിമാസ സബ്‌സ്‌ക്രിപ്‌ഷനുകള്‍ ആവശ്യമായി വരില്ല. ഇത്തരത്തിലുള്ള റിലീസ് ആഴത്തിലുള്ള മാര്‍ക്കറ്റ് ഉണ്ടാക്കും. സ്മാർട്ട്‌ഫോൺ ഉള്ള ആർക്കും സിനിമ ആക്‌സസ് ചെയ്യാൻ കഴിയുമെന്നാണ് ഈ വര്‍ഷം ആദ്യം ഒരു സിനിമ ഇൻഡസ്ട്രി കോൺക്ലേവിൽ ആമിര്‍ ഖാന്‍ പ്രസ്താവിച്ചിരുന്നു.

ഈ ധീരമായ നിലപാട് പരമ്പരാഗത സ്ട്രീമിംഗ് ഭീമന്മാരെ ശരിക്കും ഭയപ്പെടുത്തുന്നു എന്നാണ് വിവരം. സീതാരേ സമീൻ പറിനെ യൂട്യൂബിൽ നിന്ന് ഒഴിവാക്കാൻ നെറ്റ്ഫ്ലിക്സ് കിണഞ്ഞ് ശ്രമിക്കുന്നു എന്നാണ് വിവരം. “യുട്യൂബ് പേ-പെർ-വ്യൂ മോഡലിലേക്കുള്ള സിനിമയുടെ മാറ്റം ഒടിടി സംവിധാനത്തിന്‍റെ ഇപ്പോഴത്തെ ഘടനയെ പൂര്‍ണ്ണമായും അലോസരപ്പെടുത്തും” ഒരു മുതിർന്ന വ്യവസായ വിദഗ്ധന്‍ ബോളിവുഡ് ഹംഗാമയോട് പറയുന്നത്.

“ആമിർ ഇത് പിന്തുടർന്നാൽ, കൂടുതൽ ചലച്ചിത്ര നിർമ്മാതാക്കൾ തുറന്ന പ്ലാറ്റ്‌ഫോമുകൾ വഴി നേരിട്ട് പ്രേക്ഷകരിലേക്ക് റിലീസ് ചെയ്യാന്‍ ധൈര്യപ്പെടും. ഇതിനർത്ഥം നെറ്റ്ഫ്ലിക്സ്, ആമസോൺ പോലുള്ള സ്ട്രീമിംഗ് പ്ലാറ്റ്‌ഫോമുകൾക്ക് ഇപ്പോള്‍ ലഭിക്കുന്ന ആധിപത്യം അവസാനിക്കും. നെറ്റ്ഫ്ലിക്സിനെ സംബന്ധിച്ചിടത്തോളം, സീതാരേ സമീൻ പർ സ്വന്തമാക്കുന്നത് അവരുടെ വരുമാന മാര്‍ഗ്ഗത്തെ സംരക്ഷിക്കുന്നതിന്‍റെ ഭാഗമായാണ്. ആമിറിന്റെ പ്രേക്ഷക വ്യാപ്തിയും പ്രോജക്റ്റിന്റെ വിശ്വാസ്യതയും ഇന്ത്യയിലെ ഒടിടി സംവിധാനത്തെ തന്നെ അട്ടിമറിക്കുന്ന ഒരു സംഭവമായി ഈ ചിത്രത്തെ മാറ്റുന്നു ” മുതിർന്ന വ്യവസായ വിദഗ്ധന്‍ പറഞ്ഞു.