മലപ്പുറത്ത് ദേശീയപാതയില്‍ വീണ്ടും വിള്ളല്‍; നിര്‍മാണ കമ്പനി ജീവനക്കാരെ നാട്ടുകാർ തടഞ്ഞു

മലപ്പുറം: മലപ്പുറത്ത് ദേശീയപാതയില്‍ വീണ്ടും വിള്ളല്‍. മലപ്പുറം കാക്കഞ്ചേരി കിന്‍ഫ്ര ഫുഡ്പാര്‍ക്കിനു സമീപമാണ് ദേശീയപാത 66ല്‍ വിള്ളല്‍ കണ്ടത്. 25 മീറ്ററോളം നീളത്തിലാണ് കാലിക്കറ്റ് സര്‍വകലാശാല ഭാഗത്തേക്കുള്ള പുതിയ പാതയില്‍ വിള്ളല്‍ സംഭവിച്ചിരിക്കുന്നത്.

നിര്‍മാണ കമ്പനിയുടെ ജീവനക്കാരെത്തി വിള്ളുണ്ടായ ഭാഗം താത്കാലികമായി അടയ്ക്കാന്‍ ശ്രമിച്ചെങ്കിലും നാട്ടുകാര്‍ തടഞ്ഞു. ദേശീയപാത അതോറിറ്റിയുടെ വിദഗ്ധസംഘം സ്ഥലത്തെത്തി പരിശോധന നടത്തണമെന്നാണ് നാട്ടുകാരുടെ ആവശ്യം. ഇതുവഴിയുള്ള ഗതാഗതവും താത്കാലികമായി വഴിതിരിച്ചുവിട്ടിരിക്കുകയാണ്.