സ്ത്രീയുടെ അസ്ഥികൂടം കുഴിച്ചെടുത്ത് സെല്‍ഫി എടുക്കാന്‍ ശ്രമിച്ചു ; യുവാവ് അറസ്റ്റില്‍

കൊല്‍ക്കത്ത: പശ്ചിമബംഗാളില്‍ മദ്യലഹരിയില്‍ സ്ത്രീയുടെ അസ്ഥികൂടം കുഴിച്ചെടുത്ത് സെല്‍ഫി എടുക്കാന്‍ ശ്രമിച്ച യുവാവ് അറസ്റ്റില്‍. പുര്‍ബ ബേദിനിപുര്‍ ജില്ലയിലെ കൊന്‍ടായ് ഗ്രാമത്തിലാണ് സംഭവം നടന്നത്.

കുഴിമാടത്തിനരികില്‍ നിന്ന് അസ്ഥികൂടത്തിനൊപ്പം സെല്‍ഫി എടുക്കാന്‍ ശ്രമിക്കുന്നതിനിടെയാണ് പ്രഭാകര്‍ സിദ് എന്ന യുവാവിനെ നാട്ടുകാര്‍ പിടികൂടിയത്.ഇയാളെ നാട്ടുകാര്‍ പൊതിരെ തല്ലിയതായാണ് വിവരം. മാത്രമല്ല, പ്രഭാകറിനെ കസ്റ്റഡിയിലെടുക്കാനെത്തിയ പോലീസിനുനേരെയും നാട്ടുകാര്‍ തിരിഞ്ഞു.

സംഭവസ്ഥലത്ത് പോലീസ് എത്തുമ്പോള്‍ നാട്ടുകാരുടെ മര്‍ദ്ദനമേറ്റ് അവശനിലയിലായിരുന്നു പ്രഭാകര്‍. അക്രമാസക്തരായ ജനക്കൂട്ടത്തില്‍ നിന്നും പ്രഭാകറിനെ രക്ഷിക്കാന്‍ പോലീസ് ബലപ്രയോഗത്തിന് മുതിര്‍ന്നതോടെ നാട്ടുകാര്‍ ഇഷ്ടികയും മറ്റുമെറിഞ്ഞ് പോലീസിനെ ആക്രമിച്ചു.

സംഭവത്തില്‍ മൂന്ന് പോലീസുകാര്‍ക്ക് പരിക്കേറ്റിട്ടുണ്ട്. രണ്ടുമണിക്കൂര്‍ കഠിനാധ്വാനം ചെയ്താണ് പോലീസുകാര്‍ പ്രഭാകറിനെ രക്ഷപ്പെടുത്തിയത്. മൃതപ്രായനായ യുവാവിനെ പോലീസ് ഉടന്‍തന്നെ കാന്തി സബ് ഡിസ്ട്രിക്ട് ആശുപത്രിയില്‍ പ്രവേശിപ്പിച്ചു.