വിവാദ പരാമർശം; സോനു നിഗത്തിന്‍റെ ഹർജി തള്ളി കോടതി

ബെംഗളൂരു: പഹൽഗാം ഭീകരാക്രമണവുമായി കന്നഡ ഭാഷാ വാദത്തെ ബന്ധപ്പെടുത്തിയ കേസില്‍ ഗായകന്‍ സോനു നിഗത്തിന്‍റെ ഹര്‍ജി തള്ളി കര്‍ണാടക ഹൈക്കോടതി. കേസ് റദ്ധാക്കണമെന്ന് ആവശ്യപ്പെട്ട് നൽകിയ ഹര്‍ജിയാണ് തള്ളിയത്. അന്വേഷണവുമായി സോനു നിഗം സഹകരിക്കണമെന്നും മൊഴി ഓണ്‍ലൈനായി രേഖപ്പെടുത്തിയാല്‍ മതിയെന്നും കോടതി വ്യക്തമാക്കി.

ബെംഗളൂരുവിലെ ഷോയ്ക്കിടെ സോനുവിനോട് കന്നഡ ഭാഷയിലെ പാട്ട് പാടിയേ തീരൂ എന്ന് ഒരാൾ ആവശ്യപ്പെട്ടിരുന്നു. എന്നാൽ ഇത്തരം നിർബന്ധങ്ങളാണ് പിന്നീട് പഹൽഗാം പോലുള്ള ഭീകരാക്രമണങ്ങളിലേക്ക് വഴി വെയ്ക്കുന്നത് എന്നായിരുന്നു ഇതിന് സോനു നിഗം നൽകിയ മറുപടി. താൻ പാടിയവയിൽ ഏറ്റവും നല്ല പാട്ടുകൾ കന്നഡയിലേതാണ്. എന്നാൽ ഇത്തരത്തിൽ ഭീഷണി ഉയരുന്നത് വേദനാജനകമാണെന്ന് സോനു പറഞ്ഞിരുന്നു.

പഹൽഗാം ആക്രമണത്തെ കുറിച്ചുള്ള പരാമർശത്തിനെതിരെ കന്നഡ രക്ഷാ വേദികെ എന്ന സംഘടന നൽകിയ പരാതിയിലാണ് ഗായകനെതിരെ അവലഹള്ളി പൊലീസ് കേസ് എടുത്തത്. ഭാഷാ വാദത്തെ ഭീകരാക്രമണവുമായി എന്തിന് ബന്ധപ്പെടുത്തി എന്ന് ഗായകൻ വിശദീകരിക്കണം. വിശദീകരണം തൃപ്തികരമല്ലെങ്കിൽ കേസെടുക്കുമെന്നും അവലഹള്ളി പൊലീസ് അറിയിച്ചിരുന്നു. തുടര്‍ന്നാണ് കേസ് എടുത്തത്.