ഓപ്പറേഷൻ സിന്ദൂറിന് ശേഷം സൈനികരെ നേരിൽ കണ്ട് അഭിനന്ദിച്ച് പ്രധാനമന്ത്രി

ന്യൂഡല്‍ഹി: ഓപ്പറേഷൻ സിന്ദൂറിന് ശേഷം സൈനികരെ നേരിൽ കണ്ട് അഭിനന്ദിച്ച് പ്രധാനമന്ത്രി നരേന്ദ്ര മോദി. ജലന്ധറിനടുത്തുള്ള ആദംപുർ വിമാനത്താവളത്തിലേക്ക് അപ്രതീക്ഷിതമായാണ് പ്രധാനമന്ത്രി എത്തിയത്. വ്യോമസേന ഉദ്യോഗസ്ഥരെ കണ്ട അദ്ദേഹം നന്ദി അറിയിച്ചു.
ഓപ്പറേഷന്‍ സിന്ദൂറിന് ശേഷം പ്രധാനമന്ത്രി സൈനികര്‍ക്ക് നന്ദി അറിയിച്ചിരുന്നു. ഇപ്പോള്‍ പ്രധാനമന്ത്രി രാജ്യത്തിന്‍റെ നന്ദി സൈനികരെ നേരിട്ട് അറിയിച്ചു.

പാകിസ്ഥാനുമായുള്ള സംഘർഷം തുടരുന്നതിനിടെയാണ് പഞ്ചാബിലുള്ള ആദംപുര്‍ വ്യോമത്താവളത്തില്‍ മോദി എത്തിയത്. ഇന്ന് രാവിലെയാണ് പ്രധാനമന്ത്രി ഇവിടെ എത്തിയത്. ഓപ്പറേഷന്‍ സിന്ദൂര്‍ സംബന്ധിച്ച് വ്യോമസേന ഉദ്യോഗസ്ഥര്‍ പ്രധാനമന്ത്രിയോട് കാര്യങ്ങള്‍ വിശദീകരിച്ചു. ഓപ്പറേഷന്‍ സിന്ദൂര്‍ സംബന്ധിച്ച് കഴിഞ്ഞ ദിവസം രാത്രി പ്രധാനമന്ത്രി രാജ്യത്തെ അഭിസംബോധന ചെയ്ത് സംസാരിച്ചിരുന്നു.

ആണവശേഷിയുടെ പേരില്‍ പാകിസ്താന്‍ ഭീഷണിയും വിലപേശലും നടത്തുന്നത് ഇന്ത്യ ഒരിക്കലും വെച്ചുപൊറുപ്പിക്കില്ലെന്ന് പ്രധാനമന്ത്രി പറഞ്ഞിരുന്നു. ഓപ്പറേഷന്‍ സിന്ദൂര്‍ എന്നത് വെറുമൊരു പേരല്ല, നയമാണ്. ഇന്ത്യന്‍ സൈനികരുടെ കരുത്തില്‍ തോല്‍വി കണ്ട പാകിസ്താന്‍ സഹായത്തിനായി പരക്കം പായുകയായിരുന്നു. പാകിസ്താനെതിരായ സൈനിക നടപടി തത്കാലം മരവിപ്പിക്കുക മാത്രമാണ് ചെയ്തതെന്നും ഭീകരതയും ചര്‍ച്ചയും ഒന്നിച്ചുപോകില്ലെന്നും മോദി പറഞ്ഞു.