പാലിയേക്കര ടോള്‍ പ്ലാസ ജീവനക്കാരന് മര്‍ദ്ദനം; ലോറി ഡ്രൈവര്‍ അറസ്റ്റിൽ

തൃശൂര്‍: പാലിയേക്കര ടോള്‍ പ്ലാസിയില്‍ ഡ്യൂട്ടിയിലുണ്ടായിരുന്ന ജീവനക്കാരന് ക്രൂര മര്‍ദ്ദനം. ടോള്‍ ബൂത്തിലെ കളക്ഷന്‍ ജീവനക്കാരനായ ഉത്തര്‍പ്രദേശ് ഫൈസാബാദ് സ്വദശി പപ്പു കുമാറിനാണ് മര്‍ദനമേറ്റത്. ശനിയാഴ്ച രാത്രി 11.30 ഓടെയാണ് സംഭവം. തൃശൂര്‍ ഭാഗത്തുനിന്ന് വന്ന ടോറസ് ലോറിയുടെ ഫാസ്ടാഗ് റീഡാകാത്തതിനെ തുടര്‍ന്ന് വാഹനം മാറ്റിയിടാന്‍ പറഞ്ഞതിലുള്ള ദേഷ്യത്തിലായിരുന്നു മര്‍ദനം.

ടോള്‍ ബൂത്തിനുള്ളില്‍ അതിക്രമിച്ച് കയറി ജീവനക്കാരനെ അസഭ്യം പറയുകയും മുഖത്തും കഴുത്തിലും ഇടിക്കുകയുമായിരുന്നു. പരിക്കേറ്റ പപ്പു കുമാറിന്റെ പരാതിയില്‍ കേസെടുത്ത പുതുക്കാട് പൊലീസ് പ്രതിയെ കസ്റ്റഡിയിലെടുത്തു. ചേര്‍പ്പ് സ്വദേശിയാണ് പിടിയിലായത്. ലോറിയില്‍ നിന്ന് ഇറങ്ങിയവന്ന ഡ്രൈവര്‍ ടോള്‍ പ്ലാസയിലിരിക്കുന്ന ജീവനക്കാരെ പലതവണ മര്‍ദിക്കുന്നത് ദൃശ്യത്തില്‍ വ്യക്തമാണ്. പിടിച്ചുമാറ്റാന്‍ ശ്രമിക്കുന്നതിനിടയിലും മര്‍ദനം തുടര്‍ന്നു.