തൃശൂര്‍ എക്കാലവും കണ്ടതില്‍വച്ച് മികച്ച പൂരമായിരിക്കും ഈ വര്‍ഷം നടക്കുക: കെ രാജന്‍

തൃശൂര്‍: പൂരം നടത്തിപ്പില്‍ ജനങ്ങള്‍ക്ക് ആശങ്ക വേണ്ടെന്ന് റവന്യൂ മന്ത്രി കെ രാജന്‍. പൂരത്തിന് തൃശൂര്‍ പൂര്‍ണ സജ്ജം. തൃശൂര്‍ എക്കാലവും കണ്ടതില്‍വച്ച് മികച്ച പൂരമായിരിക്കും ഈ വര്‍ഷം നടക്കുക. കൂടുതല്‍ ആളുകള്‍ക്ക് പൂരം കാണാന്‍ കഴിയുന്ന വിധത്തിലാണ് ജില്ലാ ഭരണകൂടവും സംസ്ഥാന സര്‍ക്കാരും ചേര്‍ന്ന് സജ്ജീകരണങ്ങള്‍ ഒരുക്കിയിരിക്കുന്നതെന്ന് മന്ത്രി പറഞ്ഞു.

നാളെ രാവിലെ കണിമംഗലം ശാസ്താവ് എഴുന്നള്ളി വരുന്നതു മുതല്‍ 36 മണിക്കൂര്‍ നീണ്ടു നില്‍ക്കുന്ന ലോകത്തിലെ ഏറ്റവും വലിയ പൂരമാണ് നടക്കുന്നത്. ആളുകള്‍ക്ക് ധൈര്യമായി പൂരത്തിനെത്താം. ഒരു കുറവും ആര്‍ക്കും ഉണ്ടാകില്ല. പത്തായപ്പുര മുതല്‍ കറന്റ് ബുക്ക്‌സ് വരെ വെടിക്കെട്ട് ജനങ്ങള്‍ക്ക് അടുത്തുനിന്ന് കാണാന്‍ സാധിക്കും. ചില നിയന്ത്രണങ്ങള്‍ ഇക്കാര്യത്തില്‍ ഏര്‍പ്പെടുത്തും. പൂരത്തിലേക്ക് എത്ര ലക്ഷം ആളുകളെത്തിയാലും തൃശൂരിന്റെ മണ്ണിലും മനസിലും ഇടമുണ്ടെന്നും മന്ത്രി പറഞ്ഞു.