കുവൈത്തിൽ അബോധാവസ്ഥയിൽ കണ്ടെത്തിയ രണ്ട് പ്രവാസികളെ പ്രോസിക്യൂഷന് കൈമാറി

കുവൈത്തിലെ ഹവല്ലിയിൽ അബോധാവസ്ഥയിൽ കണ്ടെത്തിയ രണ്ട് പ്രവാസികളെ പബ്ലിക് പ്രോസിക്യൂഷന് കൈമാറി. 33ഉം 27ഉം വയസ്സുള്ള രണ്ട് പേരെയാണ് തിരക്കേറിയ ന​ഗരത്തിലെ റോഡരികിൽ അബോധാവസ്ഥയിൽ കിടക്കുന്ന നിലയിൽ കണ്ടെത്തിയത്. അമിതമായി മദ്യപിച്ച നിലയിലായിരുന്നു ഇരുവരും.

സുരക്ഷാ വൃത്തങ്ങൾ പറയുന്നതനുസരിച്ച് മൈദാൻ ഹവല്ലിയിൽ രണ്ട് പേർ ചലനമറ്റ് അബോധാവസ്ഥയിൽ കിടക്കുന്നതായി ആഭ്യന്തര മന്ത്രാലയത്തിന്റെ ഓപറേഷൻസ് റൂമിൽ വിവരം ലഭിക്കുകയായിരുന്നു. തിരക്കേറിയ നടപ്പാതയാണ് മൈദാൻ ഹവല്ലിയിലുള്ളത്. ഇവിടെ പൊതു മധ്യത്തിലാണ് ഇരുവരെയും അബോധാവസ്ഥയിൽ അധികൃതർ കണ്ടെത്തിയത്. വിവരം ലഭിച്ചയുടൻ തന്നെ പോലീസ് പട്രോളിങ് സംഘം സംഭവ സ്ഥലത്തെത്തി. ഇരുവരും നിലത്ത് കിടക്കുകയായിരുന്നെന്നും ചുറ്റും കാൽനടയാത്രക്കാർ പരിഭ്രാന്തരായി നോക്കി നിൽപ്പുണ്ടായിരുന്നെന്നും പോലീസ് പറഞ്ഞു.