നല്ല ടേസ്റ്റി അരി പപ്പടം തയ്യാറാക്കിയാലോ

പുട്ടിനും, ചോറിനും, കാപ്പിക്കും വരെ ഈ അരി പപ്പടം ഉപയോഗിക്കാം. പച്ചരി അരച്ചെടുത്താണ് ഇതിൻ്റെ മാവ് തയ്യാറാക്കുന്നത്. ആവിയിൽ വേവിച്ചെടുത്ത മാവ് വെയിലത്ത് വെച്ച് ഉണക്കിയെടുത്ത് സൂക്ഷിക്കും. ഇത് ആവശ്യാനുസരണം എണ്ണയിൽ വറുത്തെടുക്കാം.

ചേരുവകൾ നോക്കാം

പച്ചരി
പച്ചമുളക്
ജീരകം
ഉപ്പ്
കായപ്പൊടി
മഞ്ഞൾപ്പൊടി
കുരുമുളകുപൊടി
എള്ള്

തയ്യാറാക്കുന്ന വിധം

പച്ചരി തലേദിവസം തന്നെ വെള്ളത്തിൽ കുതിർത്തി വെയ്ക്കാം. 8 മണിക്കൂറെങ്കിലും ഇങ്ങനെ ചെയ്യണം. അതിലേയ്ക്ക് പച്ചമുളക്, ജീരകം, ആവശ്യത്തിന് ഉപ്പ്, കായപ്പൊടി എന്നിവ ചേർത്ത് നന്നായി അരച്ചെടുക്കാം. അതിലേയ്ക്ക് നിറം നൽകാൻ ഒരു നുള്ള് മഞ്ഞൾപ്പൊടിയും എരിവിന് കുരുമുളകുപൊടിയും, കുറച്ച് കറുത്ത എള്ളും ചേർത്തിളക്കി യോജിപ്പിക്കാം. പരന്ന പാത്രത്തിൽ കുറച്ച് എണ്ണ പുരട്ടി മാവിൽ നിന്നും കുറച്ചു വീതം ഒഴിക്കാം. ഈ തട്ടുകൾ ആവിയിൽ വെച്ചു വേവിക്കാം. വേവിച്ചെടുത്ത മാവ് വെയിലത്ത് വെച്ച് ഉണക്കി അടച്ചുറപ്പുള്ള ഈർപ്പം ഒട്ടുമില്ലാത്ത പാത്രത്തിൽ സൂക്ഷിച്ചു വെയ്ക്കാം. ആവശ്യമുള്ളത്ര എണ്ണയിൽ വറുത്തെടുക്കാം.