അമേരിക്കന്‍ കാറുകള്‍ ജപ്പാനില്‍ അപൂര്‍വമായി കാണുന്നതെന്തുകൊണ്ട് ?

ജപ്പാന്‍ വാഹന നിര്‍മ്മാതാക്കളുടെ കാറുകള്‍ അമേരിക്കന്‍ നിരത്തുകളില്‍ കാണാറുണ്ടെങ്കിലും ജാപ്പനീസ് റോഡുകളില്‍ പുതിയ അമേരിക്കന്‍ വാഹനങ്ങള്‍ അപൂര്‍വ കാഴ്ചയാണ്. ഇത് അമേരിക്കന്‍ പ്രസിഡന്റ് ട്രംപിനെ അലോസരപ്പെടുത്തുന്ന ഒരു കാര്യമാണ്. അമേരിക്കയില്‍ ഏറ്റവും കൂടുതല്‍ വിറ്റഴിക്കപ്പെടുന്ന രണ്ടാമത്തെ വാഹന നിര്‍മ്മാതാക്കളാണ് ജപ്പാനിലെ ടൊയോട്ട, കഴിഞ്ഞ വര്‍ഷം അമേരിക്കയില്‍ 2.3 ദശലക്ഷത്തിലധികം വാഹനങ്ങള്‍ വിറ്റഴിച്ചു.
അതേസമയം, അമേരിക്കന്‍ വ്യവസായ പ്രമുഖരായ ജനറല്‍ മോട്ടോഴ്സ് ജപ്പാനില്‍ വെറും 587 ഷെവര്‍ലെകളും 449 കാഡിലാക്കുകളും മാത്രമാണ് വിറ്റത്, അതേസമയം ഫോര്‍ഡ് ഒരു പതിറ്റാണ്ട് മുമ്പ് ജാപ്പനീസ് വിപണിയില്‍ നിന്ന് പിന്മാറുകയും ചെയ്തു.

‘അവര്‍ തങ്ങളുടെ കാറുകള്‍ എടുക്കുന്നില്ല എന്നും, പക്ഷേ തങ്ങള്‍ അവരുടെ ദശലക്ഷക്കണക്കിന് കാറുകള്‍ എടുക്കുന്നുവെന്നും ട്രംപ് പറയുന്നു. ജപ്പാന്‍ തങ്ങളുടെ സഖ്യകക്ഷിയോട് ‘വ്യാപാരത്തില്‍ വളരെ മോശമായി’ പെരുമാറുന്നുവെന്നാണ് ട്രംപിന്റെ ഇപ്പോഴത്തെ ആരോപണം. അതുകൊണ്ടുതന്നെ, അമേരിക്കന്‍ ഓട്ടോമൊബൈല്‍ വ്യവസായത്തെ പുനരുജ്ജീവിപ്പിക്കാന്‍ ശ്രമിക്കുന്നതിനായി, ഇറക്കുമതി ചെയ്യുന്ന വാഹനങ്ങള്‍ക്ക് 25 ശതമാനം ലെവി ചുമത്തി ട്രംപ്, ജപ്പാന് കനത്ത പ്രഹരമേല്‍പ്പിച്ചു. ജപ്പാനിലെ പലരും വിന്റേജ് അമേരിക്കന്‍ കാറുകളെ ആരാധിക്കാറുണ്ടെങ്കിലും പുതിയ വീലുകളുടെ കാര്യത്തില്‍, അവര്‍ കൂടുതല്‍ വിശ്വസിക്കുന്നത് ആഭ്യന്തര ബ്രാന്‍ഡുകളിലാണ്, ഇതും അമേരിക്കയ്ക്ക് തിരിച്ചടിയാണ്.

അതേസമയം, ഹോണ്ട തങ്ങളുടെ ഹൈബ്രിഡ് സിവിക് മോഡലിന്റെ ഉത്പാദനം ജപ്പാനില്‍ നിന്ന് അമേരിക്കയിലേക്ക് മാറ്റുകയാണ്. അമേരിക്കക്കാര്‍ക്ക് ജപ്പാന്‍ കാറുകളോട് പ്രിയമാണെങ്കിലും എന്നാല്‍ ജാപ്പനീസ് ഉപഭോക്താക്കള്‍ക്ക് അമേരിക്കന്‍ കാറുകളോട് താല്‍പ്പര്യമില്ല. അതുകൊണ്ടുതന്നെ അമേരിക്കന്‍ കാറുകള്‍ക്ക് ജപ്പാനില്‍ ഡിമാന്‍ഡ് കുറയുകയാണ്. ഇതുതന്നെയാണ് അമേരിക്കന്‍ കാര്‍ നിര്‍മ്മാതാക്കള്‍ നേരിടുന്ന പ്രധാന പ്രശ്‌നവും.