വിസ്മയിപ്പിക്കും; സ്റ്റിയറിംഗ് തൊടാതെ പാർക്ക് ചെയ്യുന്ന കോഡിയാക്ക്

വാഹന ലോകത്തെ വിസ്മയിപ്പിക്കുന്ന ഫീച്ചറുകളുമായി എത്തിയ സ്കോഡ കോഡിയാക്കിൻ്റെ രണ്ടാം തലമുറ മോഡൽ ഇന്ത്യയിൽ തരംഗം സൃഷ്ടിക്കുകയാണ്. ഏഴ് സീറ്റുകളുള്ള ഈ പ്രീമിയം എസ്.യു.വി കാഴ്ചയിലും കരുത്തിലും മുൻതലമുറയെക്കാൾ ഏറെ മുന്നിലാണ്. എന്നാൽ, വാഹനത്തിലെ ഒരു ഫീച്ചർ ഒരു കൊച്ചുകുട്ടിയെ അക്ഷരാർത്ഥത്തിൽ ഞെട്ടിച്ചിരിക്കുകയാണ്. കോഡിയാക്കിൻ്റെ സെൽഫ് പാർക്കിംഗ് അസിസ്റ്റ് കണ്ട് അത്ഭുതപ്പെടുന്ന കുട്ടിയുടെ വീഡിയോ ഇപ്പോൾ സോഷ്യൽ മീഡിയയിൽ വൈറലായിരിക്കുകയാണ്.

‘ബൈക്ക് വിത്ത് ഗേൾ’ എന്ന ഇൻസ്റ്റാഗ്രാം പേജിലൂടെ പ്രശസ്ത ഓട്ടോമൊബൈൽ ഇൻഫ്ലുവൻസർ പ്രിയങ്ക കൊച്ചാർ ആണ് ഈ രസകരമായ വീഡിയോ പങ്കുവെച്ചത്. തിരക്കേറിയ ഒരു സ്ഥലത്ത്, പ്രിയങ്ക ഡ്രൈവിംഗ് സീറ്റിലിരുന്ന് കോഡിയാക്കിലെ സെൽഫ് പാർക്കിംഗ് അസിസ്റ്റ് ഫീച്ചർ ഉപയോഗിച്ച് വാഹനം പാർക്ക് ചെയ്യുകയായിരുന്നു. എന്നാൽ, തൊട്ടടുത്തുണ്ടായിരുന്ന ഒരു കൊച്ചുകുട്ടി ആകാംഷയോടെ ഈ കാഴ്ച നോക്കി നിന്നു. സ്റ്റിയറിംഗ് വീലിൽ കൈവെക്കാതെ തന്നെ കാർ സ്വയം കൃത്യമായി പാർക്ക് ചെയ്യുന്നത് കണ്ടപ്പോൾ ആ കുട്ടിക്ക് വിശ്വസിക്കാൻ കഴിഞ്ഞില്ലെന്ന് വീഡിയോയിൽ നിന്ന് വ്യക്തമാണ്. കുട്ടിയുടെ മുഖത്തെ അത്ഭുതഭാവം ഏവരെയും ആകർഷിക്കുന്നതാണ്.

വീഡിയോയിൽ, റോഡിലെ തിരക്കിനിടയിലും കോഡിയാക്കിൻ്റെ നിശബ്ദമായ ക്യാബിനെക്കുറിച്ചും പ്രിയങ്ക പറയുന്നുണ്ട്. കൂടാതെ, മുൻവശത്തെ മസാജ് സീറ്റുകൾ, വിശാലമായ ബൂട്ട് സ്പേസ്, മികച്ച ഡ്രൈവിംഗ് അനുഭവം എന്നിവയെക്കുറിച്ചും അവർ വാചാലയാവുന്നു. “പുതിയ സ്കോഡ കോഡിയാക്കിനൊപ്പം ഒരാഴ്ച ചെലവഴിച്ചു. അതിലെ ഫീച്ചറുകൾ ശരിക്കും എന്നെ അത്ഭുതപ്പെടുത്തി. നിങ്ങളുടെ പ്രിയപ്പെട്ട ഫീച്ചർ ഏതാണ്?” എന്ന അടിക്കുറിപ്പോടെയാണ് പ്രിയങ്ക ഈ വീഡിയോ പങ്കുവെച്ചത്.

പ്രീമിയം എസ്.യു.വി ശ്രേണിയിലെ ശക്തനായ എതിരാളിയാണ് പുതിയ സ്കോഡ കോഡിയാക്ക്. ടൊയോട്ട ഫോർച്യൂണർ, എംജി ഗ്ലോസ്റ്റർ, ജീപ്പ് മെറിഡിയൻ തുടങ്ങിയ വാഹനങ്ങളുമായിട്ടാണ് ഇത് പ്രധാനമായും മത്സരിക്കുന്നത്. 2.0 ലിറ്റർ ടർബോ പെട്രോൾ എൻജിനാണ് ഈ വാഹനത്തിന് കരുത്തേകുന്നത്. ഇത് 201 പി.എസ് പവറും 320 എൻ.എം ടോർക്കും ഉത്പാദിപ്പിക്കുന്നു. 46.89 ലക്ഷം രൂപ മുതൽ 48.69 ലക്ഷം രൂപ വരെയാണ് വാഹനത്തിൻ്റെ എക്സ്-ഷോറൂം വില.