തീയറ്ററിൽ സിനിമ കണ്ടുകൊണ്ടിരിക്കേ ലൈംഗിക ഉദ്ദേശത്തോടെ പെരുമാറി

കോഴിക്കോട്: തീയറ്ററിൽ സിനിമ കണ്ടുകൊണ്ടിരിക്കേ അപമര്യാദയായി പെരുമാറി. ഉടൻ തന്നെ പോലീസ് കൺട്രോൾ റൂമിൽ പെൺകുട്ടി വിവരം അറിയിച്ചതിനെത്തുടർന്ന് യുവാവിനെ അറസ്റ്റ് ചെയ്ത് പോലീസ്. കോഴിക്കോട് വെള്ളയില്‍ സ്വദേശി നാലുകുടിപറമ്പില്‍ സി വി മന്‍സിലില്‍ 18 കാരനായ ഇര്‍ഫാന്‍ ആണ് പിടിയിലായത്. കോടതിയില്‍ ഹാജരാക്കിയ ഇയാളെ റിമാൻഡ് ചെയ്തു. കോഴിക്കോട് ശ്രീ തീയറ്ററിൽ കഴിഞ്ഞ ദിവസമാണ് സംഭവം നടന്നത്.

സിനിമ കണ്ടുകൊണ്ടിരിക്കുകയായിരുന്ന കക്കോടി സ്വദേശിനിയായ പെണ്‍കുട്ടിയോട് ഇയാള്‍ ലൈംഗിക ഉദ്ദേശത്തോടെ പെരുമാറുകയായിരുന്നു. ഉടന്‍ തന്നെ പെണ്‍കുട്ടി പൊലീസ് കണ്‍ട്രോള്‍ റൂമില്‍ വിവരം അറിയിച്ചു. ഇതുപ്രാകാരം കസബ എസ്‌ഐ സുനില്‍ കുമാര്‍, എഎസ്‌ഐമാരായ രജീഷ്, സജേഷ് കുമാര്‍, സീനിയര്‍ സിവില്‍ പൊലീസ് ഓഫീസര്‍ രാജീവ് കുമാര്‍ പാലത്ത്, ലാല്‍ സിതാര എന്നിവര്‍ ചേര്‍ന്നാണ് ഇര്‍ഫാനെ കസ്റ്റഡിയില്‍ എടുത്തത്.